कोकण रेल्वे मार्गावर सुकिवलीनजीक अपघात : उडी मारल्याने चालक बचावला
प्रतिनिधी / खेड
कोकण रेल्वे मार्गावर मुंबईहून केरळच्या दिशेने ट्रक वाहतूक करणाऱया रो-रो सेवेतील एक मालवाहू ट्रक अचानक रूळावर कोसळल्याची घटना मंगळवारी मध्यरात्री 2 च्या सुमारास सुकिवली-बौद्धवाडीनजीक घडली. ट्रक चालक वसीम याकूब शेख (34, पनवेल) याने उडी मारल्याने तो बचावला, मात्र ट्रकचा चक्काचूर झाला आहे. या अपघातामुळे कोकण मार्गावरील वाहतूक तासभर ठप्प झाली होती.
‘रो-रो’ वाहतुकीच्या सेवेतून रायगड जिल्हय़ातील कोलाड येथून वेरणा येथे लोखंडी पत्रे वाहतूक करणारा ट्रक सुकिवली-बौद्धवाडीनजीकच्या वळणावर आला असता अचानक रूळावर कोसळला. मध्यरात्रीच्या सुमारास झालेल्या मोठय़ा आवाजाने नजीकचे रहिवासी लगोलग घराबाहेर आले. मात्र अंधारामुळे काहीच दृष्टीस पडले नाही. कोकण रेल्वे प्रशासनाचे आपत्कालीन पथक व अधिकारी तातडीने घटनास्थळी पोहोचले. पथकाने तातडीने मदतकार्य हाती घेत रूळावर कोसळलेला अपघातग्रस्त ट्रक क्रेनच्या सहाय्याने पहाटे 3 च्या सुमारास बाजूला करत मार्ग वाहतुकीसाठी पूर्ववत केला. अपघातामुळे रत्नागिरी दिशेने जाणारी कोकणकन्या व तुतारी एक्स्प्रेस या दोन रेल्वे गाडय़ा वेगवेगळ्य़ा स्थानकावर थांबवण्यात आल्या. यामुळे वाहतूक सुमारे एक तास विस्कळीत होऊन रेल्वे गाडय़ांचा वेगही मंदावला होता.
ट्रकमध्ये 21 टनापेक्षा अधिक साहित्य होते. ट्रकचा लोखंडी साखळदंड तुटून तो कोसळल्याचा प्राथमिक अंदाज व्यक्त होत आहे. बुधवारी सकाळी रेल्वेच्या अधिकाऱयांनी अपघाताची पाहणी केली. अपघाताचे नेमके कारण चौकशीअंती स्पष्ट होईल, असे त्यांनी सांगितले. दरम्यान, रेल्वे प्रशासनाच्या हलगर्जीपणामुळेच ट्रक कोसळल्याचा दावा ट्रक मालक जाकिरखान पठाण यांनी केला आहे.
अपघात चौकशीसाठी चार सदस्यीय समिती
सुकिवलीनजीक घडलेल्या ट्रक अपघाताच्या चौकशीसाठी विविध खात्यांतील चार अधिकाऱयांची समिती नियुक्त करण्यात आल्याची माहिती कोकण रेल्वेचे जनसंपर्क अधिकारी सचिन देसाई यांनी दिली. समितीच्या अहवालानंतर अपघाताच्या नेमक्या कारणांचा उलगडा होणार आहे. ट्रकमधील साहित्य व्यवस्थित बांधले न गेल्यामुळेच ट्रक जागेवरून हलून कोसळला असावा, असा अंदाजही व्यक्त केला जात आहे.
दैव बलवत्तर म्हणून वाचलो
रात्रीच्या सुमारास ट्रकमध्येच झोपलो होतो. अचानक ट्रकचे साखळदंड तुटले अन् ट्रक रो-रो सेवेच्या बाहेर जाऊ लागताच जीव वाचवण्यासाठी काही कळायच्या आतच बाहेर उडी मारली. दैव बलवत्तर म्हणून अपघातातून वाचलो, अशी प्रतिक्रिया ट्रक चालक वसीम शेख याने व्यक्त केली.
