ऑनलाईन टीम/मुंबई
मुख्यमंत्री उद्धव ठाकरे यांनी सही केलेल्या एका महत्त्वाच्या फाईलमध्ये फेरफार करत चक्क आदेशच फिरवल्याचा धक्कादायक प्रकार उघडकीस आला आहे. या प्रकारानंतर मंत्रालयात एकच खळबळ उडाली आहे. याप्रकरणी मरीन ड्राइव्ह पोलीस ठाण्यात गुन्हा दाखल करण्यात आला आहे.
मुख्यमंत्री ठाकरे यांनी सार्वजनिक बांधकाम विभागाच्या एका अभित्यांच्या चौकशीचे आदेश दिले होते. संबंधित फाईलवर मुख्यमंत्र्यांनी सही केल्यानंतर त्या फाईलमधील मजकूरच बदलण्यात आला. मुख्यमंत्र्यांनी सही केल्यानंतर स्वाक्षरीच्या वरच्या भागात लाल शाईने एक अतिरिक्त मजकूर लिहण्यात आला. त्यामध्ये संबंधित अभियंत्याची चौकशी बंद करावी, असा शेरा लिहिण्यात आला होता.
शिवसेना-भाजप युतीचं सरकार असताना जे.जे. स्कूल ऑफ आर्टसमधील बांधकामात अनियमितता झाल्याच्या कारणावरून सार्वजनिक बांधकाम खात्यातील अनेक अभियंत्यांची चौकशी करण्याचे आदेश देण्यात आले होते. त्यामध्ये फेरफार करण्यात आलेल्या फाईलमधील अधीक्षक अभियंता नाना पवार यांचाही समावेश होता. नाना पवार हे त्यावेळी कार्यकारी अभियंता होते.
