ऑनलाईन टीम / मुंबई :
माजी गृहमंत्री अनिल देशमुख यांच्या अडचणीत आणखी वाढ झालेली दिसून येत आहे. मनी लाँड्रिंगच्या आरोपांप्रकरणी अंमलबजावणी संचलनालयाच्या वतीने विशेष ईडी कोर्टात आज आरोपपत्र दाखल करण्यात येणार आहे. देशमुखांचे माजी पीए संजीव पालांडे आणि कुंदन शिंदे यांच्याविरोधात हे आरोपपत्र दाखल होणार आहे.
महाराष्ट्राचे माजी गृहमंत्री अनिल देशमुख यांच्या विरोधात मनी लाँड्रिंगचा गुन्हा दाखल करण्यात आला आहे. या प्रकरणात आतापर्यंत संजीव पालांडे आणि कुंदन शिंदे या दोघा जणांना अटक करण्यात आली आहे. हे दोघे अनिल देशमुख यांचे सचिव होते. या दोघांना 25 जून रोजी अटक करण्यात आली होती.
पालांडे आणि शिंदे सुरुवातीला ईडीच्या कोठडीत होते. त्यानंतर त्यांना न्यायलयीन कोठडी सुनावण्यात आल्यानंतर त्यांना जेलमध्ये ठेवण्यात आले. त्यांना अटक करून आता 60 दिवस होत आहेत. ईडीच्या कायद्यानुसार 60 दिवसात आरोपपत्र दाखल करायचे असते. त्यानुसार पालांडे आणि शिंदे यांना अटक करुन आज 60 दिवस पूर्ण झाल्याने ईडीकडून वतीने कोर्टात हे आरोपपत्र दाखल केले जाणार आहे.
दरम्यान, या आरोपपत्रात अनेक महत्वाचे पुरावे आहेत. सचिव वाझेचा जबाब, बार मालकांचा जबाब, इतर बोगस कंपन्यांचे पुरावे, अनिल देशमुख यांच्या संस्थांत आलेल्या पैशाचे पुरावे या आरोपपत्रात आहेत.
