कोविशिल्डचे 18 हजार, तर कोव्हॅक्सिनचे 600 डोस प्राप्त : फक्त 45 वर्षावरील नागरिकांना दुसरा डोस
प्रतिनिधी / सिंधुदुर्गनगरी:
सिंधुदुर्ग जिह्यासाठी कोविशिल्डचे 18 हजार डोस आणि कोव्हॅक्सिनचे 600 डोस प्राप्त झाले आहेत. हे सर्व डोस 45 वर्षावरील नागरिकांना दुसऱया डोससाठीच वापरण्यात येणार आहेत. त्याचे नियोजन करण्यात येत आहे. त्यानुसार कुठे किती डोस दिले आहेत, हे जाहीर करण्यात आल्याची माहिती जिल्हा आरोग्य अधिकारी डॉ. महेश खलिपे यांनी दिली.
लसीच्या तुकडय़ामुळे अनेक लोक दुसऱया डोसच्या प्रतीक्षेत होते. त्यांना दिलासा मिळाला आहे. सिंधुदुर्ग जिह्यासाठी रविवारी कोविशिल्ड लसीचे पंचेचाळीस वर्षापेक्षा जास्त वयोगटासाठी बुस्टर डोस देण्यासाठी एकूण 18 हजार डोस प्राप्त झाले आहेत. जिल्हय़ात एकूण 36 लसीकरण सत्रांद्वारे प्रतिदिन 250 प्रमाणे कोविशिल्ड लसीचा दुसरा डोस सोमवार 10 व मंगळवार 11 मे रोजी जाहीर केलेल्या ठिकाणी दिला जाणार आहे
ही लस केवळ बुस्टर डोस किंवा दुसरा डोस देण्यासाठीच वापरली जाणार आहे. त्यामुळे ज्या नागरिकांचा दुसरा डोस आहे, त्यांनी सोमवारी किंवा मंगळवारी लस घ्यावी. जिल्हय़ातील इतर नागरिकांना सदरची लस ही केवळ दुसरा डोस देण्याकरिता राखीव असल्याने पहिला डोस देता येणार नाही. तसेच 18 ते 24 वयोगटातील नागरिकांना पहिला अथवा दुसरा डोस देता येणार नाही. नागरिकांनी प्रशासनास सहकार्य करावे, असे आवाहन डॉ. खलिपे यांनी केले आहे.
तसेच सिंधुदुर्ग जिह्यासाठी कोव्हॅक्सिनचे 600 डोस प्राप्त झाले आहेत. हे डोस सोबत यादी जाहीर केलेल्या 12 केंद्रांवर प्रतिसत्र 50 प्रमाणे 45 वर्षावरील नागरिकांना केवळ दुसरा डोस देण्यासाठीच राखीव आहेत. सदरचे लसीकरण 12 संस्थांमध्ये सोमवार 10 मे रोजी आयोजित केले आहे.
कोविशिल्ड देण्यात येणाऱया आरोग्य केंद्रांची यादी
ग्रामीण रुग्णालयात वैभववाडी, देवगड, मालवण, कुडाळ, वेंगुर्ले, दोडामार्ग आणि उपजिल्हा रुग्णालय कणकवली, सावंतवाडी आणि शिरोडा तसेच प्राथमिक आरोग्य केंद्र वैभववाडी, वरवडे, कनेडी, फोंडा, खारेपाटण, नांदगाव, कळसुली, पडेल, मिठबाव, शिरगाव, मोंड, फणसगाव, मोरगाव, गोळवण, मसुरे, आचरा, हिवाळे, कडावल, पणदूर, हिर्लोक, कसाल, वालावल, तुळस, आंबोली, मळेवाड आणि निरवडे येथे प्रत्येकी 500 डोस देण्यात आले आहेत. 10 मे रोजी 250 आणि 11 मे रोजी 250 याप्रमाणे दोन दिवस बुस्टर डोस 45 वर्षावरील नागरिकांना दिला जाणार आहेत.
कोव्हॅक्सिन देण्यात येणाऱया आरोग्य केंद्रांची नावे
कासार्डे, इळये, चौके, कट्टा, माणगाव, रेडी, आडेली, परुळे, बांदा, सांगेली, तळकट आणि भेडशी या 12 आरोग्य केंद्रांमध्ये कोव्हॅक्सिनचे प्रत्येकी 50 डोस देण्यात आले आहेत. 10 मे रोजी 45 वर्षावरील नागरिकांना बुस्टर डोस देण्यात येणार आहे.
