साडेसहा लाखांच्या 17 मोटार सायकली जप्त
प्रतिनिधी / बेळगाव
मोटार सायकली चोरणाऱया एका अट्टल त्रिकुटाला अटक करुन त्यांच्या जवळून 6 लाख 50 हजार रुपये किंमतीच्या 17 मोटार सायकली जप्त करण्यात आल्या आहेत. बेळगाव ग्रामीण पोलिसांनी गुरुवारी ही कारवाई केली आहे.
अक्षय शंकर चौगुले (वय 22, रा. मारुती गल्ली, मच्छे), महेश भावकाण्णा अनगोळकर (वय 19), आकाश भावकाण्णा अनगोळकर (वय 21, दोघेही रा. बसवनकुडची) अशी अटक करण्यात आलेल्या तिघा जणांची नावे आहेत. बेळगाव ग्रामीणचे पोलीस निरीक्षक सुनीलकुमार नंदेश्वर व त्यांच्या सहकाऱयांनी ही कारवाई केली आहे.
राजहंसगड येथील किल्ल्याजवळून केए 22 एचबी 9913 या हिरो स्प्लँडर मोटार सायकलीची चोरी झाली होती. गेल्या गुरुवारी 9 जुलै रोजी ही घटना घडली होती. या संबंधी बेळगाव ग्रामीण पोलीस स्थानकात एफआयआर दाखल करण्यात आला होता. पोलिसांनी तपास हाती घेतला असता हे त्रिकुट त्यांच्या जाळय़ात अडकले.
बेळगाव ग्रामीणचे एसीपी के. शिवारेड्डी, गुन्हे तपास विभागाचे एसीपी महांतेश्वर जिद्दी यांच्या मार्गदर्शनाखाली पोलीस निरीक्षक सुनीलकुमार नंदेश्वर, उपनिरीक्षक आनंद आदगोंड, वाय. वाय. तळेवाड, एम. एस. गाडवी, सी. एम. हुनशाळ, एन. एम. चिप्पलकट्टी, जी. वाय. पुजार, एस. एम. सिंदगी आदींचा समावेश असलेल्या पथकाने या त्रिकुटाला अटक केली आहे.
पोलीस सुत्रांनी दिलेल्या माहितीनुसार वाघवडे क्रॉसजवळ संशयास्पदरित्या फिरताना या त्रिकुटाला अटक करण्यात आली. त्यानंतर त्यांची कसून चौकशी केली असता बेळगाव शहर व जिह्यात त्यांनी मोटार सायकल चोरण्याची कबुली दिली. पोलिसांनी त्यांच्या जवळून 17 मोटार सायकली जप्त केल्या आहेत.
