दापोली प्रतिनिधी
दापोली शहरातील वृंदावन हॉटेल समोर भलामोठा आम्रवृक्ष कोसळून चार दुचाकी व दोन चारचाकी गाड्यांचे अतोनात नुकसान झाले. हा प्रकार सोमवारी दुपारी घडला.
सोमवारी दुपारी अचानक मोठा आवाज करत शहरातील वृंदावन हॉटेल समोरील मोठे आंब्याचे झाड रस्त्यावर कोसळले. यावेळी रहदारी देखील मोठ्या प्रमाणात होती. मात्र मोठा आवाज झाल्याने अनेकांनी सावध होऊन तेथून पळ काढला. यामुळे मोठी जीवितहानी टळली. मात्र यात झाडाखाली उभ्या असणाऱ्या दापोली-हर्णे रोड वरील चार दुचाकी व दोन चारचाकी गाड्यांचे अतोनात नुकसान झाले.
या घटनेमुळे दापोली हर्णे रोडवरील वाहतूक स्तब्ध झाली. दापोली नगरपंचायतीच्या कर्मचाऱ्यांनी तातडीने घटनास्थळी धाव घेऊन झाड कट करून वाहतूक सुरळीत केली व झाडाखाली चक्काचूर झालेल्या गाड्या बाहेर काढल्या.
