संघर्ष प्रत्येक क्षेत्रात आहे. कष्टातून जे यश मिळतं त्याचा आनंद हा त्या व्यक्तीशिवाय कुणीच जाणू शकत नाही. मनोरंजन क्षेत्रातील अनिश्चिततेच्या वातावरणामुळे या क्षेत्रातील संघर्षातून यशस्वी होणाऱया कलाकारांचा प्रवास त्यांचे चाहते नेहमीच अभिमानाने ऐकतात. अभिनेता निखिल राऊत यानेही त्याच्या संघर्षमय काळातील काही आठवणी शेअर केल्या. निखिलने एकेकाळी मुंबईत दादरमधील फुटपाथवर रात्री झोपून काढल्या आहेत, पण कामाची लाज न बाळगता आज त्याने अभिनेता म्हणून स्थान बळकट करत वांद्र्य़ात हक्काचे घरही घेतले आहे. त्याच्या या कर्तृत्वामुळेच त्याच्या अभिनयाला झळाळी आल्याच्या प्रतिक्रिया त्याच्या चाहत्यांनी दिल्या आहेत.
निखिल राऊत सध्या येऊ कशी तशी मी नांदायला या मालिकेत मोहित ही भूमिका साकारत आहे. एखाद्या श्रीमंत मालकाच्या हो ला हो म्हणणाऱया होयबा टाइपची ही भूमिका निखिलने अत्यंत उत्तम साकारली आहे. यापूर्वी काहे दिया परदेस या मालिकेतही निखिल झळकला होता. फत्तेशिकस्त, फर्जंद या सिनेमातही निखिलच्या भूमिकेचे कौतुक झाले होते.
त्या काळातील काही भावूक आठवणी सांगताना निखिल म्हणतो, अभिनयातच करिअर करायचं म्हणून मी पुण्यातून मुंबईला येण्याची तयारीही केली होती. पण वडीलांची नोकरी गेली आणि आमचं आर्थिकचक्रच बिघडले. सुरूवातीला मी दुधाच्या पिशव्या घरोघरी पोहोचवण्याचं काम केलं. त्यानंतर एका कंपनीत कमिशन बेसिसवर काम करू लागलो. एकदा पुण्यात दुपारच्या वेळी प्युरिफायरच्या मार्केटिंगसाठी एका घरी गेलो असताना त्या घरातील बाईंनी खूप वाईट शब्दात अपमान केला. त्यादिवशी ठरवलं की अभिनयाच्या आवडीलाच करिअर बनवायचं. मुंबई गाठायचं ठरवलं पण तोपर्यंत पुण्यातून मुंबईला ऑडीशनसाठी जाताना खूप पैसे खर्च व्हायला लागले. मग मात्र मुंबईतच रहायचं ठरवलं. दिवसभर ऑडीशन्स आणि रात्री फुटपाथवर झोप असा प्रवास सुरू झाला. एका ऑडीशनच्या निमित्ताने सहसूत्रसंचालनाची संधी मिळाली. सेटवर स्पॉटबॉयचे काम करत असताना काही कलाकारांची रिप्लेसमेंट करण्याची संधी मिळाली. तेव्हाच सुपरस्टार या शोबाबत कळलं आणि माझं आयुष्य बदलून गेलं. या शोमध्ये मी उपविजेता झालो. कामं मिळतं गेली आणि आज अभिनेता म्हणून ओळख बनवू शकलो.
