चार जणांना अटक, एक आरोपी फरार, फलटण पोलिसांची कारवाई
प्रतिनिधी/ फलटण
येथील फलटणा पंढरपूर रोडवरील गोविंद डेअरीसमोर चारचाकी कारची नंबर प्लेट बदलून, दोन मोटरसायकली व कारचा वापर करून दोन सुरे बाळगून दरोडा टाकण्याच्या तयारीमध्ये असलेल्या चोरांच्या टोळीला फलटण शहर पोलिसांनी शिताफीने जेरबंद केल्याने पुढील अनर्थ टळला आहे. टोळीतील चार जणांना अटक केली असून एक जण फरार झाला आहे.
याबाबत फलटण शहर पोलीस स्टेशनमधून मिळालेली माहिती अशी की, दिनांक 25 रोजी रात्र गस्ती करिता असलेले पोलीस नाईक नितीन भोसले व चालक अमृत करपे, होमगार्ड काळोखे हे पेट्रोलिंग करीत असताना गोविंद डेअरीच्या पुढे पंढरपूर रोड येथे काही इसम एक चार चाकी गाडीची नंबर प्लेट बदली करीत असल्याचे त्यांना दिसून आले. त्यांचा संशय आल्याने गाडी थांबली असता सदरचे इसम पळून जाण्याचा प्रयत्न करू लागले. त्यावेळी लागलीच पिसीआरला मोबाईलवरून बोलावून सदर गाडीचा पाठलाग करून सदर गाडी पोलिसानी ताब्यात घेतली. त्यांच्यासोबत आणखी दोन मोटारसायकली असल्याचे निदर्शनास आले. त्यांना देखील ताब्यात घेण्यात आले आहे. त्यांच्याजवळ 2 धारधार सुरे मिळून आले आहेत. तसेच एक मारुती सुझुकी कंपनीची सेलेरो कार, दोन मोटर सायकली तीन मोबाईल असा जप्त मुद्देमाल पोलिसांनी हस्तगत पेला.
संशयित हे लुटमार करण्याच्या तयारीत असताना मिळून आलेले असल्याने गुन्हा रजिस्टर नंबर व कलम 252/ 2020 प्रमाणे गुन्हा दाखल करण्यात आला आहे. एक आरोपी मात्र पळून गेला आहे.
संशयित अभिमान अर्जुन खिलारे (वय 23 रा. मोरोची ता. माळशिरस), सागर भारत माने (वय 22 रा. सुळेवाडी ता. माळशिरस), राजकुमार किसन खिलारे (वय 20 रा. मोरोची ता. माळशिरस), सुरज संपत भिलारे (वय 24 रा. कर्नलवाडी ता. भोर जि. पुणे) यांना अटक करण्यात आली आहे. तर रमन अडागळे (रा. मोरोची ता. माळशिरस) हा पळून गेला आहे.
यातील आरोपी यांच्यावर यापुर्वीचे गुन्हय़ाचे रेकॉर्ड असून त्यांच्याकडे बारकाईने विचारपूस करुन आणखी गुन्हे उघडकीस आणण्याचा प्रयत्न चालू असल्याचे पोलिस सूत्रांनी सांगितले आहे. सदरची कारवाई पोलीस अधीक्षक तेजस्वी सातपुते, अप्पर पोलीस अधिक्षक धीरज पाटील, उपविभागीय पोलिस अधिकारी तानाजी बरडे यांच्या मार्गदर्शनाखाली फलटण पोलीस ठाण्याचे पोलीस निरीक्षक प्रताप पोमण, पोलीस हेड कॉन्स्टेबल सचिन रावळ, नितिन भोसले, खाडे, धापते, अच्युत जगताप, सांडगे आदी पोलीस अधिकारी, कर्मचाऱयांनी केली आहे.
