प्रतिनिधी / खेड
कोकण मार्गावर २६ सप्टेंबरपासून धावणाऱ्या दादर-सावंतवाडी तुतारी विशेष रेल्वेगाडीच्या वेळापत्रकात मध्य रेल्वेने बदल करण्याचा निर्णय घेतला आहे. त्यानुसार तुतारी एक्सप्रेस मंगळवारपासून नव्या वेळापत्रकानुसार कोकण मार्गावर धावणार आहे. ही गाडी दादर येथून रात्री १२ वाजून ५ मिनिटांनी सुटून सकाळी १०.४० वाजता सावंतवाडीला पोहचेल. परतीच्या प्रवासात सावंतवाडी येथून संध्याकाळी ७.१० वाजता सुटून दुसऱ्या दिवशी सकाळी ६.४० वाजता दादरला पोहचेल. कोरोना नियंत्रणात आल्यानंतर कोकण मार्गावर सर्वप्रथम दादर – सावंतवाडी कोविड स्पेशल विशेष गाडी चालवण्यात आली. या गाडीला प्रवाशांचा भरभरून प्रतिसाद मिळाल्यानंतर एक अतिरिक्त डबाही वाढवण्यात आला होता.
