सांगलीकरांनी सोडला निश्वास: रात्री उशिरा गवा रेस्क्यू कंटेनरमधून नैसर्गिक अधिवासाकडे रवाना: वनविभाग आणि प्राणीमित्र संघटनेचे प्रयत्न यशस्वी
सांगली/प्रतिनिधी
मंगळवारी पहाटेपासून सांगली शहरातील वसंतदादा मार्केट यार्ड येथे गवा रेडा आल्याने सांगलीकरांचे धाबे दणादणाले होते. पण अखेर त्याला कोणतीही इजा न करता पकडण्यात आले आहे. तब्बल १८ तासाच्या थरारानंतर गवा रेडा जेरबंद करण्यात वनविभागाला यश आले आहे. बुधवारी रात्री दीडच्या सुमारास त्याला वनविभागाने आणलेल्या कंटेनरमध्ये पकडून त्याला नैसर्गिक अधिवासात नेण्यात आले.
कसबे डिग्रज आणि सांगलीवाडी परिसरातील शेतात गेल्या चार दिवसापासून फिरत असणारा गवा रेडा हा मंगळवारी पहाटे सांगली शहरात आला. सांगली शहरातील अनेक मुख्य वस्तीतून तो वसंतदादा मार्केट यार्ड येथे आला. मार्केट यार्डातील एका बाजूला असणाऱ्या सेंट्रल वेअर हाऊसच्या बोळात तो अडकून राहिला व त्याठिकाणाहून तो बाहेर पडू शकणार नाही याची दक्षता घेण्यात आली. त्यामुळे हा गवा रेडा याठिकाणीच अडकून पडला पण याठिकाणाहून त्याला तात्काळ पकडण्यात मात्र वनविभागाला आणि पुणे येथील रेसक्यू पोर्स तसेच प्रयाणीमित्र संघटनेला यश आले नाही. दुपारपर्यंत त्याला यासाठी गहन चर्चा सुरू होती. त्यानंतर रात्री उशिरा हा गवा रेडा पकडल्यानंतर त्याला ताकाळ पुर्णपणे बंदोबस्तात नैसर्गिक अधिवासात वनविभागाच्या कंटेनर मधून नेण्यात आले.
