ऑनलाईन टीम / पुणे :
भारतीय संविधान संवर्धन व संरक्षण समितीच्यावतीने भारताच्या 71 व्या संविधान दिनानिमित्त देण्यात येणारा संविधान रत्नपुरस्कार महाराष्ट्र राज्याच्या विधानसभेच्या उपसभापती डॉ. नीलम गोऱ्हे आणि गोरगरिब कष्टकऱ्यांचे नेते बाबा कांबळे यांना देण्यात येणार आहे, अशी माहिती भारतीय संविधान संवर्धन व संरक्षण समितीचे मुख्य समन्वयक विठ्ठल गायकवाड आणि बहुजन शिक्षक संघाचे अध्यक्ष डॉ.गौतम बेंगाळे यांनी आज आयोजित पत्रकार परिषदेत दिली.
गायकवाड म्हणाले, या पुरस्काराचे वितरण शनिवार दिनांक 21 नोव्हेंबर रोजी सायंकाळी 6.00 वाजता पुणे श्रमिक पत्रकार संघाच्या कमिन्स हॉलमध्ये अखिल भारतीय मराठी साहित्य संमेलनाचे माजी अध्यक्ष डॉ. श्रीपाल सबनीस यांच्या हस्ते प्रदान करण्यात येणार आहे.
यावेळी कार्यक्रमाच्या अध्यक्षस्थान माजी गृहराज्य मंत्री आणि पुणे शहर जिल्हा काँग्रेस कमिटीचे अध्यक्ष रमेश बागवे भूषविणार आहेत. तर विशेष अतिथी म्हणून राष्ट्रवादी काँग्रेसचे नेते रवींद्र माळवदकर, शिवसेना शहर प्रमुख संजय मोरे, ॲड. प्रमोद आडकर, नरसेविका लताताई राजगुरू, दादासाहेब सोनवणे आदी मान्यवर उपस्थित राहणार आहेत.
