राज्य नियोजन मंडळाचे कार्यकारी अध्यक्ष राजेश क्षीरसागर यांच्या पुढाकाराने शस्त्रक्रियेसाठी दाखल
कोल्हापूर प्रतिनिधी
शिवसेनाप्रमुख बाळासाहेब ठाकरे यांच्या जयंती निमित्त येथील सीपीआरमध्ये जिह्यातील 0 ते 18 वयोगटातील सुमारे 122 मुलांची मोफत टू डी इको तपासणी करण्यात आली होती. यातील काही मुलांवर हृदय शस्त्रक्रिया करणे गरजेचे असल्याचे निदान झाले होते. राज्य नियोजन मंडळाचे कार्यकारी अध्यक्ष राजेश क्षीरसागर यांच्या माध्यमातून मुंबई येथील प्रसिद्ध नारायणा हॉस्पिटलमध्ये या मुलांवर मोफत हृदय शस्त्रक्रिया करण्यात येणार आहे. यातील अत्यावश्यक आठ मुलांना मोफत शस्त्रक्रियेकरिता दोन दिवसांपूर्वी मुंबईतील नारायणा हॉस्पिटलमध्ये दाखल करण्यात आले आहे.
शुक्रवारी राज्य नियोजन मंडळाचे कार्यकारी अध्यक्ष राजेश क्षीरसागर आणि शिवसेना कोल्हापूर जिल्हा संर्पकप्रमुख अरुणभाई दुधवडकर यांनी नारायणा हॉस्पिटल येथे मुलांची व पालकांची भेट घेवून आपुलकीने विचारपूस केली. यावेळी या मुलांवर करण्यात येणाऱया उपचार पद्धतीची आणि शस्त्रक्रियेची माहितीही जाणून घेतली. यावेळी राजेश क्षीरसागर म्हणाले, कोल्हापूर जिह्यात गेली 12 वर्षे शिवसेनेचे वैद्यकीय मदत कार्य अखंडित सुरु आहे. दुर्धर आजारांवरील शस्त्रक्रियेसह मुख्यमंत्री सहाय्यता निधी आणि विविध ट्रस्टच्या माध्यमातून लाखो रुपयांचा निधी रुग्णांना मिळवून देण्यात आला आहे. यावेळी नारायणा हॉस्पिटलचे डॉ. सुप्रमित सेन, डॉ.योगेश खाचंदे, डॉ. अवि शहा, डॉ. अमित नागपुरे आदी उपस्थित होते.
मुंबईत नारायणा हॉस्पिटल येथे दाखल झालेल्या मुलांना व त्यांच्या सोबत असणाऱया पालकांना येण्या-जाण्या खर्चासह शस्त्रक्रियेकरिता दाखल कालावधीत मोफत राहण्यासह, जेवणाचीही सुविधा राजेश क्षीरसागर फौंडेशनच्या माध्यमातून उपलब्ध करून देण्यात आली आहे.
