मुंबई / ऑनलाईन टीम
राष्ट्रवादीचे प्रमुख शरद पवार यांना यूपीएचे अध्यक्ष बनवण्याचे पुनरूच्चार शिवसेना खासदार संजय राऊत यांनी दिल्लीत माध्यमांशी बोलताना केला. मात्र, त्यांच्या या वक्तव्यावर काँग्रेस नेत्यांकडून तीव्र प्रतिक्रिया येऊ लागल्या आहेत. काँग्रेसचे प्रदेशाध्यक्ष नाना पटोले यांनी देखील यावर प्रतिक्रिया दिली आहे. ते मुंबईत आयोजित पत्रकार परिषदेत बोलत होते.
नाना पटोले म्हणाले की, युपीएचं नेतृत्व कोणी करावं हे युपीएच्या सदस्यांनी ठरवलं आहे. मी परवाही राज्याच्या मुख्यमंत्र्यांकडे ते शरद पवार साहेबांचे प्रवक्ते आहेत का असा उल्लेख केला होता. ज्या गोष्टीशी संबंध नाही त्यावर संजय राऊतांनी चर्चा करु नये इतकाच आमचा सल्ला आहे.
काँग्रेस प्रवक्ते हुसेन दलवाई यांनी देखील संजय राऊतांच्या विधानावर नाराजी व्यक्त केली आहे. संजय राऊत हे शरद पवारांचे खास शिष्य आहेत. त्यामुळे ते शिवसेनेत आहेत की राष्ट्रवादी काँग्रेसमध्ये आहेत असा गोंधळ निर्माण झालेला आहे. बऱ्याचदा ते अशी आवई उठवतात आणि नंतर गोत्यात येत असतात. त्यामुळे त्यांनी केलेले विधान हे हास्यास्पद असल्याचे हुसेन दलवाई यांनी एका वृत्तवाहिनीशी बोलताना म्हटले आहे.
शरद पवारांनी युपीएचं नेतृत्व करण्यासंबंधी शिवसेना खासदार संजय राऊत यांनी केलेल्या विधानामुळे काँग्रेसमध्ये नाराजी असल्याचं वृत्त असून याच पार्श्वभूमीवर सुप्रिया सुळे यांनी सोनिया गांधी यांची दिल्लीत भेटल्याची चर्चा सुरु आहे. सुप्रिया सुळे यांनी सोशल मीडियावर सोनिया गांधी यांना भेटल्यासंदर्भात ट्विट देखील केले आहे.
