अमन चोप्रा उत्कृष्ट फलंदाज व मालिकावीरचा मानकरी
क्रीडा प्रतिनिधी/ बेळगाव
अमन चोप्राच्या आक्रमक व दमदार शतकाच्या जोरावर जैन इलेव्हन संघाने जैन ब्लास्टर संघाचा 29 धावांनी पराभव करून जैन समाज मर्यादित एमएसडी चषक पटकाविला. शतकवीर अमन चोप्रा याला मालिकावीर व उत्कृष्ट फलंदाज म्हणून गौरविण्यात आले.
युनियन जिमखाना मैदानावर जैन स्पोर्ट्स क्लब आयोजित जैन समाज मर्यादित एमएसडी चषक टेनिसबॉल क्रिकेट स्पर्धेत सकाळी खेळविण्यात आलेल्या पहिल्या उपांत्य फेरीच्या सामन्यात जैन ब्लास्टर संघाने जैन सुपरकिंग्जचा 5 गडय़ांनी पराभव केला. जैन सुपरकिंग्जने 12 षटकात 5 बाद 83 धावा केल्या. त्याला उत्तर देताना जैन ब्लास्टर संघाने 10.4 षटकात 5 बाद 84 धावा करून सामना जिंकला. दुसऱया उपांत्य सामन्यात जैन इलेव्हनने जैन स्पार्टन्स संघाचा 6 गडय़ांनी पराभव करून अंतिम फेरीत प्रवेश केला. जैन स्पार्टन्स संघाने 12 षटकात 92 धावा केल्या. त्याला उत्तर देताना जैन इलेव्हनने 11.2 षटकात 4 बाद 93 धावा करून सामना जिंकला.
अंतिम सामन्यात जैन इलेव्हन संघाने 14 षटकांत 6 बाद 144 धावांचा डोंगर रचला. अमन चोप्राने केवळ 41 चेंडूत 5 षटकार, 8 चौकारांसह शतक ठोकत 8 वर्षापूर्वी जतिन जैनने केलेला विक्रम मोडित काढून नवा विक्रम नोंदवला. त्याला उत्तर देताना जैन ब्लास्टरने 14 षटकात 7 बाद 115 धावाच केल्या. सामन्यानंतर प्रमुख पाहुणे म्हणून समाजाचे चेअरमन शांतीलालजी जैन, जब्बारजी जैन, आनंदजी जैन, प्रकाश जैन, प्रकाश पोरवाल, मनोज संचीटी आदी मान्यवरांच्या हस्ते विजेत्या जैन इलेव्हन, उपविजेत्या जैन ब्लास्टर संघाला चषक व रोख रक्कम देऊन गौरविण्यात आले. अंतिम सामन्यातील सामनावीर व उत्कृष्ट फलंदाज अमन चोप्रा (जैन इलेव्हन), उत्कृष्ट गोलंदाज निलेज पालीवाला (जैन ब्लास्टर), मालिकावीर अमन चोप्रा यांना चषक देऊन गौरविण्यात आले. कार्यक्रमाचे सूत्रसंचालन जयपाल जैन यांनी केले. स्पर्धा यशस्वी करण्यासाठी जैन स्पोर्ट्सच्या कार्यकर्त्यांनी विशेष परिश्रम घेतले.
