इस्रोची महत्त्वाकांक्षी मोहीम : अमेरिकेच्या कैरो बेटावरून प्रक्षेपित
वृत्तसंस्था / वॉशिंग्टन
भारतीय अवकाश संशोधन संस्था (इस्रो)ने जीसॅट-30 या उपग्रहाचे दक्षिण अमेरिकेच्या कैरो बेटावरून यशस्वी प्रक्षेपण केले आहे. शुक्रवारी पहाटे दोन वाजून 35 मिनिटांनी हा उपग्रह अवकाशात प्रक्षेपित करण्यात आला. जीसॅट-30 या उपग्रहामुळे इंटरनेट क्षेत्रात नवी क्रांती होणार आहे. तसेच इंटरनेट अधिक गतीने चालणार असून, 5जी नेटवर्कचे स्वप्नही लवकरच प्रत्यक्षात साकार होणार आहे. 2020 या वर्षातील इस्रोची ही महत्त्वाकांक्षी मोहीम असून, जीसॅट-30 हा उपग्रह 2005 मध्ये प्रक्षेपित केलेल्या इनसॅट-4एची जागा घेणार आहे. जलवायूमध्ये होणारे बदल आणि हवामानाचे भाकितही वर्तवण्यासाठी या उपग्रहाची मोलाची मदत होणार आहे.
जीसॅट-30चे वजन सुमारे 3100 किलो असून प्रक्षेपण केल्यापासून 15 वर्षे हा उपग्रह कार्यरत राहणार आहे. या उपग्रहाला जिओ इलिप्टकिल ऑर्बिटमध्ये स्थापित करण्यात आले आहे. यात दोन सोलर पॅनल आणि बॅटरी असून त्यामुळे ऊर्जा मिळणार आहे. यापूर्वी इनसॅट-4ए हा उपग्रह 2005 मध्ये प्रक्षेपित करण्यात आला होता. विशेष म्हणजे मोबाईल सेवा ज्या क्षेत्रात अद्याप पोहचू शकलेल्या नाहीत, त्या क्षेत्रात या नव्या उपग्रहामुळे त्या पोहोचण्यास मदत होईल. व्हीसॅट नेटवर्क, टेलिव्हिजन अपलिंकिंग, टेलिपोर्ट सेवा, डिजिटल सॅटेलाइट, डीएसएनजी, डीटीएच टेलिव्हिजन सेवा आदी सेवांचा विस्तार करण्यासाठी या उपग्रहाचा वापर होणार आहे.
