बेंगळूर /प्रतिनिधी
सहकारी विभागात जुन्या जटिल कायद्यांचा अंत करण्याची प्रक्रिया सुरू आहे. येत्या अर्थसंकल्पीय अधिवेशनात याबाबतचे विधेयकही सादर केले जाईल. ही माहिती सहकारमंत्री एस.टी. सोमशेखर यांनी शुक्रवारी दिली. ते येथे बेंगळूर जिल्हा सहकारी बँकेने (बीडीसीसी) आयोजित कर्ज वितरण कार्यक्रमाच्या उद्घाटन प्रसंगी ते बोलत होते.
ते म्हणाले की सहकारी बँकांनाही काळाबरोबर बदल करावा लागेल आणि खासगी बँकांसारख्या सेवा द्याव्या लागतील. यासाठी व्यापक बदल होणे आवश्यक आहे आणि अधिकाऱ्यांनी सकारात्मक विचारसरणीने या बदलांसाठी तयार रहावे. राज्यातील जिल्हा सहकारी बँकांची नवीन प्रयोगांसाठी निवड झाली आहे. आता या बँका ग्राहकांना बर्‍याच सेवा ऑनलाईन प्रदान करतील. त्याचा आराखडा तयार करण्यात आला असून लवकरच याची अंमलबजावणी होईल.
दरम्यान सहकार विभागाच्या वरिष्ठ प्रशासकीय अधिकाऱ्यांना असे कायदे आता अप्रासंगिक ठरले आहेत हे ओळखण्यास सांगितले गेले आहे. विभाग आता आधुनिक तंत्रज्ञानाचा वापर सुनिश्चित करेल. सर्व सहकारी संघटनांसाठी समान सॉफ्टवेअर विकसित करण्याची योजना आहे. सहकारी क्षेत्रातील बँकांवर लोकांचा विश्वास कायम आहे. या बँकांमध्ये लाखो ग्राहकांनी कोट्यावधी रुपये मुदत ठेव म्हणून ठेवले आहेत. त्यांचा विश्वास कायम ठेवावा लागेल आणि त्यासाठी पारदर्शकता आवश्यक आहे.
