नवी दिल्ली /प्रतिनिधी
शनिवारी जम्मू-काश्मीरमधील सोपोरमध्ये दहशतवादी हल्ल्याची आणखी एक घटना समोर आली आहे. हा हल्ला अरमपोरा नाका येथे झाला. पोलीस आणि सीआरपीएफच्या संयुक्त पथकाला लक्ष्य करून दहशतवाद्यांनी गोळीबार केल्याचे सांगण्यात येत आहे. या हल्ल्यात दोन सैनिक शहीद झाले आहेत. त्याचवेळी दोन नागरिकांचा मृत्यूही झाला आहे. तर दोन दोन पोलीस कर्मचारी जखमी झाले आहेत. जखमींना रुग्णालयात दाखल करण्यात आले आहे. लष्कर ए तोयबाने हा दहशतवादी हल्ला घडवला असल्याची माहिती काश्मीरचे आयजी विजय कुमार यांनी दिली आहे.
अरमपोरा नाक्यावरील तैनात असलेल्या जवानांना लक्ष्य करून हा हल्ला करण्यात आला होता. या हल्ल्यात दोन स्थानिक नागरिकांना देखील जीव गमावावा लागला आहे. याचबरोबर पोलिसांच्या वाहनाचे देखील मोठे नुकसान झाले आहे. हल्ला केल्यानंतर दहशतवादी घटनास्थळावरून फरार झाल्याची माहिती समोर आली आहे. तर, जवानांनी हल्लेखोरांना पकडण्यासाठी शोध मोहीम सुरू केली आहे.
