प्रतिनिधी / शिरोळ
नांदणी व जांभळी (ता. शिरोळ) येथे घरफोडी करणाऱ्या चोरट्यास शिरोळ पोलीस ठाण्यातील गुन्हे शोध पथकाच्या पोलिसांनी शिताफीने अटक करून चोरीचा माल हस्तगत करण्यात आला आहे. याबाबत पोलिसांकडून मिळालेली माहिती अशी की, नांदणी येथील फिर्यादी पवन चन्नाप्पा जती दि. 20 ऑक्टोंबर रोजी मध्यरात्रीच्या सुमारास घराची कडी कोंडा काढून आत प्रवेश करून अकरा हजार पाचशे रुपये किमतीचा मोबाईल व रोख रक्कम असा मुद्देमाल चोरून नेला होता.
शिरोळ पोलीस ठाणे गुन्हे शोध पथकातील पोलिसांनी सांडगेवाडी पलूस (जि. सांगली) येथील फालकेश उर्फ फालकु शांताराम चव्हाण (वय वर्षे 19) यास शिताफीने अटक केली. त्याच्याकडे अधिक चौकशी केली असता नांदणी व जांभळी या ठिकाणी घरफोडी केल्याची कबुली त्याने दिली आहे. तसेच त्याच्यावर पलूस पोलिस ठाण्यात अनेक गुन्हे दाखल आहेत. ही कारवाई सहाय्यक पोलीस निरीक्षक शिवानंद कुंभार यांच्या मार्गदर्शनाखाली पोलीस उपनिरीक्षक नवनाथ सुळे, ज्ञानेश्वर सानप, पोलिस हनुमंत माळी, ताहीर मुल्ला, पोलीस गजानन गोष्टी, पोलीस सागर खाडे, पोलीस अभिजीत परब या पथकाने केली.
