पत्रादेवी, दोडामार्ग, सातार्डा, आरोंदा, रेड्डी, आयी येथे तपासणी पथके
विमान, रेल्वे, बस कुठल्याही मार्गाने नागरिक आले, तरी तपासणी होणार
प्रतिनिधी / सिंधुदुर्गनगरी :
कोरोनाचा प्रादुर्भाव रोखण्याच्या दृष्टीने, मिशन बिगीन अगेन अंतर्गत राज्य शासनाने दिलेल्या मार्गदर्शक सूचनांनुसार दिल्ली, राजस्थान, गुजरात आणि गोवा राज्यातून महाराष्ट्रात प्रवेश करणाऱया प्रवाशांची तपासणी करण्याबाबत आदेश दिले आहेत. त्या अनुषंगाने 25 नोव्हेंबरपासून गोवा-सिंधुदुर्ग सीमेवर कार्यवाही सुरू करण्याचे आदेश जिल्हाधिकारी के. मंजुलक्ष्मी यांनी दिले आहेत. गोवा सीमेवर सहा ठिकाणी तपासणी पथके तैनात ठेवून थर्मल स्क्रीनिंग करण्याचे आदेश जिल्हाधिकाऱयांनी दिले आहेत.
राज्य शासनाने दिलेल्या मार्गदर्शक सूचनांच्या अनुषंगाने जिल्हाधिकारी कार्यालयामध्ये मंगळवारी बैठक झाली. या बैठकीस जिल्हा पोलीस अधीक्षक राजेंद्र दाभाडे, अपर पोलीस अधीक्षक तुषार पाटील, उपमुख्य कार्यकारी अधिकारी राजेंद्र पराडकर, उप प्रादेशिक परिवहन अधिकारी राजेंद्र सावंत, उपजिल्हाधिकारी डॉ. जयकृष्ण फड, सावंतवाडीचे तहसीलदार राजाराम म्हात्रे, वेंगुर्ल्याचे तहसीलदार प्रवीण लोकरे, दोडामार्गचे तहसीलदार अरुण खानोलकर, पोलीस निरीक्षक सुनील धनावडे, पोलीस निरीक्षक शिवाजी कोळी, वाहतूक शाखा पोलीस निरीक्षक अविनाश भोसले आदींसह संबंधित अधिकारी उपस्थित होते.
पत्रादेवी येथे महसूल, पोलीस आणि जिल्हा परिषद आरोग्य विभागाची तीन पथके तैनात करण्याविषयी सूचना यावेळी जिल्हाधिकाऱयांनी दिल्या. दोडामार्ग येथे दोन आणि सातार्डा, आरोंदा, रेड्डी आणि आयी या ठिकाणी तपासणीसाठी एक पथक तैनात करण्यात यावे. जिल्हय़ात प्रवेश करतेवेळी प्रवाशांना कमीत कमी वेळ थांबावे लागेल, असे नियोजन करावे. थर्मल स्क्रीनिंग करावे. ताप वगैरे लक्षणे असलेल्या प्रवाशांची अँटिजेन टेस्ट करावी. टेस्ट पॉझिटिव्ह आली, तर त्यांना नजीकच्या कोविड केअर सेंटरमध्ये ठेवावे. कोविड केअर सेंटरमधील सर्व खर्च हा संबंधित प्रवाशांनी करायचा आहे. त्या दृष्टीने महसूल व आरोग्य यंत्रणेने समन्वय साधून काम करावे. बांदा येथील प्रवाशांना बांदा प्राथमिक आरोग्य केंद्र येथे, तर दोडामार्ग येथील प्रवाशांना दोडामार्ग ग्रामीण रुग्णालय येथे तपासणीसाठी पाठवावे, आदी सूचना देण्यात आल्या.
रेल्वेने येणाऱया प्रवाशांची रेल्वे स्थानकावर तपासणी करण्यात यावी. त्यासाठी कुडाळ, सावंतवाडी, कणकवली या स्थानकांवर आरोग्य पथके तैनात ठेवावीत. गोवा, गुजरात, राजस्थान आणि दिल्ली या राज्यांमध्ये थांबा असलेल्या गाडय़ांमधून जिल्हय़ात प्रवेश घेण्यापूर्वी आरटीपीसीआर चाचणी निगेटिव्ह असणे आवश्यक आहे. तसेच सदर अहवाल प्रवाशांनी आपल्या सोबत ठेवावा. सदर आरटीपीसीआर नमुना चाचणी सिंधुदुर्गात प्रवेश करण्यापूर्वी 96 तासांच्या आत झालेली असावी. आरटीपीसीआर चाचणी नकारात्मक अहवाल नसलेल्या प्रवाशांच्या शरीराचे तापमान आणि कोवीड-19 लक्षणांची तपासणी संबंधित रेल्वे स्थानकावर केली जाईल. लक्षणे नसलेल्या प्रवाशांना घरी जाण्याची परवानगी दिली जाईल. ज्या प्रवाशांमध्ये लक्षणे दिसतील त्यांची रॅपिड अँटिजेन टेस्ट करण्यात येईल. टेस्ट पॉझिटिव्ह आलेल्या प्रवाशांना कोविड केअर सेंटरमध्ये पाठविले जाईल. पुढील काळजी घेण्याचा खर्च स्वतः प्रवाशाला उचलावा लागणार आहे.
विमानाने येणाऱया प्रवाशांच्या माहितीसाठी निवडणूक विभागाचे उपजिल्हाधिकारी डॉ. जयकृष्ण फड यांनी गोवा विमानतळ प्रशासनाशी समन्वय ठेवावा व प्रवाशांची माहिती संबंधित तालुक्मयातील तहसीलदार आणि जिल्हा आरोग्य अधिकारी यांच्याकडे द्यावी. दररोज कामानिमित्त व नोकरीनिमित्त गोवा येथे जाणाऱया व येणाऱया प्रवाशांचे थर्मल स्कॅनिंग करावे, अशा सूचना जिल्हाधिकाऱयांनी दिल्या.
