वार्ताहर / उचगांव
गांधीनगर बाजारपेठेतील एका ट्रान्सपोर्टच्या मागे आलेल्या तिघा जणांकडून दुचाकीसह ३४ हजार ५०० रुपयांचा गुटखा गांधीनगर पोलिसांनी जप्त केला. अमित सुरेशलाल अहुजा, रा. मोहिते मळा, गांधीनगर, प्रकाश मूलचंद निरंकारी रा. शिरू चौक, गांधीनगर व दीपक परशुराम चावला रा. भाजी मंडई, गांधीनगर अशी तिघांची नावे असून त्यांच्यावर गुन्हा दाखल करण्यात आला आहे.
हे तिघे गांधीनगर बाजारपेठेतील एका ट्रान्सपोर्टच्या मागे दुचाकी एम एच 09- एफडी 705वर गुटख्याचा साठा विक्रीसाठी घेऊन थांबले होते. याबाबतची माहिती गांधीनगर पोलीस ठाण्यास मिळाली. त्यानुसार हिरा पान मसाला, सुगंधी तंबाखू पत्ती व दुचाकीसह ३४ हजार ५०० रुपयांचा मुद्देमाल पोलिसांनी जप्त केला. याबाबतची फिर्याद पोलीस नाईक आकाश संभाजी पाटील यांनी गांधीनगर पोलीस ठाण्यात दिली असून या तिघांवर गुन्हा दाखल करण्यात आला आहे.
