पालकमंत्र्यांकडून जिल्हा प्रशासनाला सूचना : हॉटेल व्यावसायिकांनी खबरदारी घ्यावी!
प्रतिनिधी / सिंधुदुर्गनगरी:
सिंधुदुर्ग जिल्हय़ात कोरोना बाधित रुग्णांची संख्या वाढत असल्याने खासगी रुग्णालये कोविडसाठी घेण्यात यावीत, अशा सूचना पालकमंत्री उदय सामंत यांनी केल्या आहेत. त्याप्रमाणे आवश्यकतेनुसार खासगी रुग्णालये कोविडसाठी घेण्यात येतील, अशी माहिती जिल्हाधिकारी के. मंजुलक्ष्मी यांनी दिली.
मंत्रालयात सिंधुदुर्गचे पालकमंत्री उदय सामंत यांच्या अध्यक्षतेखाली तसेच कोकण आयुक्त अण्णासाहेब मिसाळ, आमदार वैभव नाईक यांच्या उपस्थितीत सिंधुदुर्ग जिल्हय़ातील कोविड-19 बाबत इतर विविध प्रश्नांसंदर्भात व्हीडिओ कॉन्फरन्सिंगद्वारे बैठक घेण्यात आली. या बैठकीत सिंधुदुर्ग जिल्हय़ातून जिल्हाधिकारी के. मंजुलक्ष्मी, जिल्हा पोलीस अधीक्षक दीक्षितकुमार गेडाम, जिल्हा शल्य चिकित्सक धनंजय चाकूरकर, जि. प. मुख्य कार्यकारी अधिकारी हेमंत वसेकर सहभागी झाले होते.
या बैठकीत कोविड-19 बाबत सिंधुदुर्ग जिल्हय़ाचा आढावा घेण्यात आला. सिंधुदुर्ग जिल्हय़ात वाढत चाललेल्या कोविड रुग्णांच्या पार्श्वभूमीवर नागरिकांना पर्यायी सुविधा म्हणून जिल्हय़ातील खासगी रुग्णालयेदेखील कोविडसाठी घेण्यासंदर्भात चर्चा करण्यात आली. सद्यस्थितीत जिल्हा रुग्णालयासह सर्व तालुक्मयाच्या ठिकाणी कोविड सेंटर सुरू केली आहेत. योग्य प्रकारे उपचार होऊन रुग्ण कोरोनामुक्त होत आहेत. तरी देखील रुग्ण संख्या वाढत गेल्यास खासगी रुग्णालये कोविडसाठी घेण्यात येतील, अशी माहिती देण्यात आली.
गोव्यात नोकरीनिमित्त दररोज ये-जा करणाऱया व्यक्तींना कोविड टेस्ट किंवा क्वारंटाईनची आवश्यकता नाही. त्यांची थर्मल स्क्रिनिंग करण्याचे निश्चित करण्यात आले. तसेच जिल्हय़ातील वाळू लिलाव लवकरात लवकर करण्याचे आदेश कोकण आयुक्तांनी दिले आहेत. हॉटेल व्यावसायिकांनी योग्य ती खबरदारी घेऊन हॉटेल व्यवसाय सुरू करण्याच्या सूचना बैठकीत देण्यात आल्या, अशी माहिती जिल्हा प्रशासनाकडून देण्यात आली.
