वार्ताहर / खोची
खोची ता. हातकणंगले येथील खोची बंधार्याजवळ बाबर वस्ती येथे ९ फूट लांबीची मगर धाडसी युवकांनी पकडली. त्यामुळे मगरी पासून माणसे,जनावरे यांना होणारा पुढील अनर्थ टळला. सदर मगर खोची येथील धाडसी युवक, सर्पमित्र तेजस जाधव, अमोल सुतार, अमर चव्हाण, अमोल मगदूम, अमोल चव्हाण(टोप),सांगली रेसक्यू टिमचे सचिन साळुंखे, विशाल चव्हाण व त्यांचे सहकारी यांनी पकडली.
खोची गावापासून तीन किलोमीटर अंतरावर कोल्हापूर- सांगली जिल्ह्याला जोडणारा खोची – दुधगांव दरम्यान वारणा नदीवर कोल्हापूर पद्धतीचा बंधारा आहे. या ठिकाणी असलेल्या वारणा नदीमध्ये मगरीचा वावर वरचेवर असतो.
या नदीपात्रामध्ये बंधाऱ्याचे शेजारी अनेक लोक आपली जनावरे, खोची- दुधगाव मधील नागरिक कपडे धुण्यासाठी त्यांचा वावर असतो. त्यामुळे तेथून थोड्या अंतरावर मगरी आपला विसावा करतात.पण सदर मगर नदीपात्रातून अंडी घालण्याच्या हिशोबाने वर आली असावी, असे मगर पकडणाऱ्या युवकांचे मत आहे.
या बंधाऱ्यापासून थोडया अंतरावर खोची येथील बाबर समाजातील नागरिकांची जनावरांसह वस्ती आहे. या ठिकाणी सोमवारी रात्री ९ वाजता अचानक नऊ फूट लांबीच्या मगरीचा रस्त्यावरून वाहतूक करणाऱ्या वाहनचालकांना वावर दिसला. त्यानंतर ही माहिती गावातील नागरिकांसह धाडसी तरुणांना समजली. त्यांनी सदर ठिकाणी धाव घेऊन मगरीला पकडण्याचा प्रयत्न केला. यावेळी त्यांच्या मदतीला सांगलीतील रेस्क्यू टिपचे सदस्य मदतीला आले. त्यांनी सदर मगर दोन तासाच्या अथक प्रयत्नानंतर लहान उसाच्या शेतात पकडून बंदिस्त केली. त्यानंतर सदर मगर नंरदे वन विभागाचे वनपाल साताप्पा जाधव, वनरक्षक राहुल जोनवाल,प्रदीप सुतार, मदन बांगे यांच्याकडे सुपूर्द केली. त्यांनी सदर मगर त्यांच्या नैसर्गिक अधिवासात सोडणार असल्याचे सांगितले.
