आमदार अनिल बाबर व सुहास शिंदे यांच्या हस्ते सत्कार : लिंगायत समाजाला पहिल्यांदाच संधी : कार्यकर्त्यांचा जल्लोष
वार्ताहर / खानापूर
खानापूर नगरपंचायतचे नगराध्यक्ष तुषार मंडले यांनी कार्यकाळ संपल्याने राजीनामा दिला होता. यानंतर रिक्त झालेल्या नगराध्यक्ष पदाची निवडणूक मंगळवारी नगरपंचायत सभागृहात पार पडली. बिनविरोध पार पडलेल्या निवडीत आमदार अनिल बाबर समर्थक स्वाती राजेंद्र टिंगरे यांची नगराध्यक्षापदी निवड करण्यात आली. यावेळी स्वाती टिंगरे यांचा आमदार अनिल बाबर, खानापूर जनता विकास आघाडीचे नेते सुहास शिंदे यांच्या हस्ते सत्कार करण्यात आला. निवडीनंतर कार्यकर्त्यांनी गुलालाची उधळण करत फटाक्यांची आतषबाजी करत जल्लोष केला.
खानापूर नगरपंचायतवर माजी जिल्हा परिषद सदस्य सुहास शिंदे व आमदार अनिल बाबर समर्थक गटाची संयुक्त सत्ता आहे. नागरिकांचा मागास प्रवर्गचे आरक्षण असल्याने तुषार मंडले हे नगराध्यक्ष होते. त्यांचा कार्यकाळ संपल्याने काही दिवसांपूर्वी त्यांनी जिल्हाधिकारी यांच्याकडे राजीनामा दिला होता. त्यानंतर ही निवडणूक उपविभागीय अधिकारी तथा निवडणूक निर्णय अधिकारी संतोष भोर यांच्या अध्यक्षतेखाली तसेच सहाय्यक निवडणूक अधिकारी तथा मुख्याधिकारी आश्विनी माने- पाटील यांच्या उपस्थितीत पार पडली. माजी पंचायत समिती सदस्य पांडुरंग डोंगरे, तुषार मंडले, माजी नगराध्यक्षा भारती माने, दिघंचीचे सरपंच अमोल मोरे, राजेंद्र शिंदे, नगरसेविका डॉ. वैशाली हजारे, मंगल मंडले, नूतन टिंगरे, सुनीता भगत, रेखा कदम, उमेश धेंडे उपस्थित होते.
