नागपूर / प्रतिनिधी :
राज्यातील कॅबिनेट मंत्री, काँग्रेसचे नेते विजय वडेट्टीवार हे सध्या नाराज असल्याची चर्चा आहे. ‘आपणास कुठलीही प्रतिक्रिया द्यायची नाही. जे लिहायचे ते लिहा,’ अशा शब्दांत त्यांनी आपली नाराजी माध्यमांकडे व्यक्त केली.
राज्यात सत्ताबदल होण्यापूर्वी काही महिने ते विधानसभेत विरोधी पक्षनेते होते. सत्ताबदलानंतर पक्षाच्या कोअर कमिटीतही त्यांचा सहभाग असल्याने त्यांना चांगले खाते मिळेल, अशी अपेक्षा होती. परंतु, त्यांना फारसे महत्त्वाचे खाते न मिळाल्याने ते नाराज झाले आहेत. वडेट्टीवार यांच्याकडे इतर मागासप्रवर्ग, शैक्षणिक व सामाजिक मागास प्रवर्ग, विमुक्त जाती, भटक्या जमाती आणि विशेष मागास प्रवर्ग कल्याण, खार जमिनी विकास आणि भूकंप व पुनर्वसन ही खाती देण्यात आली आहेत.
