प्रतिनिधी/ बेळगाव
खंजर गल्ली येथे मटका अड्डय़ावर गुरुवारी रात्री उशिरा छापा टाकून चार जणांना अटक करण्यात आली आहे. तसेच त्यांच्याकडून 58 हजार 100 रुपये जप्त करण्यात आले आहेत. मार्केट पोलिसांनी ही कारवाई केली आहे. सलाम अब्दुलहमीद शेख (वय 64 रा. उज्ज्वलनगर), सलमान अब्दुलहमीद शहा (वय 22 रा. खंजर गल्ली), अडवेप्पा भीमप्पा हरिजन (वय 65 रा. यमकनमर्डी) आणि शंकर यमनाप्पा अप्पय्यन्नवर (वय 65 रा. नेसरगी) अशी अटक केलेल्या संशयितांची नावे आहेत.
याबाबत मिळालेली माहिती अशी, खंजर गल्ली येथे कल्याण मटका सुरू असल्याची माहिती मार्केट पोलिसांना मिळाली होती. त्यानुसार कायदा व सुव्यवस्था विभागाचे पोलीस आयुक्त डॉ. विक्रम आमटे, मार्केटचे पोलीस निरीक्षक संगमेश शिवयोगी व त्यांच्या सहकाऱयांनी अचानक छापा टाकून चौघा जणांना ताब्यात घेतले. त्यांच्यावर मार्केट पोलीस स्थानकात कर्नाटक पोलीस कायद्यांतर्गत एफआयआर दाखल करण्यात आला असून पोलीस पुढील चौकशी करीत आहेत.
