राजकोट / वृत्तसंस्था
गुजरातमधील राजकोट जिल्हय़ात एका कोविड रुग्णालयात गुरुवारी मध्यरात्रीनंतर भीषण आगीची दुर्घटना घडली. या आगीत पाच रुग्णांचा होरपळून मृत्यू झाला. राजकोटमधील शिवानंद कोविड रुग्णालयाच्या आयसीयू कक्षामध्ये आग भडकली. या कक्षात 11 रुग्ण उपचार घेत होते. त्यापैकी पाच जणांचा मृत्यू झाला. या घटनेची चौकशी करण्याचे आदेश मुख्यमंत्री विजय रुपाणी यांनी दिले आहेत. तसेच मृतांच्या वारसांना नुकसान भरपाईची घोषणाही त्यांनी केली आहे.
आगीत जखमी झालेल्या रुग्णांना दुसऱया रुग्णालयात दाखल करण्यात आले आहे. तसेच शिवानंद रुग्णालयात दाखल करण्यात आलेल्या कोरोना रुग्णांनाही दुसऱया रुग्णालयात हलवण्यात आले आहे. रुग्णालयाला लागलेल्या आगीचे नेमके कारण स्पष्ट झाले नसले तरी चौकशीचे आदेश देण्यात आले आहेत. प्राथमिक तपासात शॉर्टसर्किटमुळेच आग लागल्याचा अंदाज वर्तविण्यात येत आहे.
कोरोनाच्या संकटामुळे देशभरातील प्रत्येक राज्यांमध्ये कोविड रुग्णालये सुरू करण्यात आली आहेत. कोरोना रुग्णांसाठी स्वतंत्र रुग्णालये कार्यरत असून, गुजरातमधील राजकोटमधील शिवानंद रुग्णालय कोविड रुग्णालय म्हणून सुरू आहे. या रुग्णालयाला गुरुवारी मध्यरात्री अचानक आग लागली. रुग्णालयातील आयसीयू कक्षात सर्वात आधी आगीचा भडका उडाला. दुर्घटनेची माहिती मिळाल्यानंतर अग्निशमन दलाने घटनास्थळी धाव घेतली. त्यानंतर काही वेळाने आग नियंत्रणात आणण्यात यश आले. या आगीत अनेक रुग्ण होरपळले आहेत. या दुर्घटनेनंतर रुग्णालयातील अन्य रुग्णांना इतर ठिकाणी हलवण्याचे व जखमींवर उपचार करण्यावर लक्ष दिले जात असल्याची माहिती अधिकाऱयांनी दिली.
