वडगावजवळील घटना झाला अपघात, लहान मुलगा गंभीर
प्रतिनिधी / सेनापती कापशी
वडगाव ता. कागल येथे ट्रॅक्टर पलटी होवून ऊसतोड मजूर महिला ट्रॅक्टरखाली चिरडल्याची घटना घडली. या महिलेचा जागीच मृत्यू झाला. तर एक लहान मुलगा गंभीर जखमी झाला आहे. रुक्मिणी दिगंबर खांडेकर (वय ४०) असे या अपघातात मयत झालेल्या महिलेचे नाव असून १२ वर्षाचा मच्छिंद्रनाथ लक्ष्मण गुळवे हा गंभीर जखमी झाला आहे. (दोघेही रा. इळगाव, ता. गंगाखेड, जि. परभणी) बुधवारी सकाळी हा अपघात झाला आहे. घटनास्थळी आक्रोश सुरु होता.
याबाबत घटना स्थळावरून मिळालेली माहिती अशी, कागलच्या शाहू साखर कारखान्याकडे उसतोड करणारे मजूर काळम्मा बेलेवाडी ता. कागल येथील ऊसतोड पूर्ण करुन कसबा सांगाव सेंटरकडे आज सकाळी डबल ट्रॉली ट्रॅक्टरमध्ये बसून जात होते. दरम्यान, वडगांव येथील एका वळणावर ट्रॅक्टर चालकाचा ताबा सुटल्याने ट्रॅक्टर रस्त्याच्या बाजूला सखल भागात पलटी झाला. त्यामुळे ट्रॅक्टरमध्ये बसलेले काही मजूर बाहेर फेकले गेले तर काहीजण ट्रॅक्टरखाली सापडले. यामध्ये वरील दोघांचा समावेश आहे.
घटनास्थळी मजूरांनी एकच हंबरडा फोडला होता. कारखान्यांचा हंगाम संपण्यासाठी काही दिवसच बाकी असताना आणि मजूरांना गावी जाण्याचे वेध लागले असताना त्यांच्यावर काळाने घाला घातल्याने हळहळ व्यक्त होत आहे.
