गोकुळ शिरगाव/वार्ताहर
राष्ट्रीय महामार्गावरून बेंगलोरहुन पुण्याकडे जात असलेल्या ट्रकचा (MH-09-EM-8045) उजव्या बाजूचा टायर फुटल्याने महामार्गावर असणाऱ्या दुभाजकाला धडकून ट्रक दुभाजकामध्ये जागीच पलटी झाला. यात ट्रक चालक जखमी झाला. मुजुमिल हवालदार (रा.चिकोडी) असे या जखमी ट्रक चालकाचे नाव आहे.
या अपघातामध्ये ट्रकमधील सिमेंट पोती महामार्गावर पडल्याने महामार्गावरील वाहतूक काहीकाळ विस्कळीत झाली होती. हा अपघात कणेरीवाडी फाट्याजवळ महालक्ष्मी पेट्रोल पंपासमोर आज, शुक्रवारी सकाळच्या सुमारास झाला. घटनास्थळी महामार्ग पोलिस आणि गोकुळ शिरगाव पोलिस ठाण्याच्या कर्मचाऱ्यांनी धाव घेत काहीवेळात वाहतूक सुरू केली.
ट्रक चालक किरकोळ जखमी झाल्याने त्याने स्वतः परस्पर उपचार घेतले आणि सिमेंट पोती दुसऱ्या ट्रक मधून पाठविण्यात आली. याबाबत कोणीच पोलिस ठाण्यात आले नसल्याने या घटनेची नोंद गोकुळ शिरगाव पोलिस ठाण्यात झाली नसल्याचे पोलिसांनी सांगितले.
