प्रतिनिधी / सांगरूळ
बहिरेश्वर ता.करवीर येथील ३२ वर्षीय तरूण ग्रामपंचायत सदस्याचा शनिवारी दुपारी कोरोनामुळे मृत्यू झाला. गावात कोरोनाचा पहिला बळी गेल्याने भितीचे वातावरण पसरले आहे. संबंधित तरुण कोरोनाविरुद्धच्या लढ्यात गावच्या दक्षता समितीत सदस्य म्हणून काम करत होते.
मयत ग्रामपंचायत सदस्याच्या घरी रक्षाबंधन दिवशी मेव्हणा आला होता. तो आजारी असल्यामुळे त्याचा स्वॅब तपासणीसाठी दिला होता. तो अहवाल पॉझिटिव्ह आल्यामुळे ग्रामपंचायत सदस्याच्या घरातील सर्वजण घाबरून गेले. तातडीने ग्रामपंचायत सदस्याच्या घरातील सर्व लोकांचे स्वॅब तपासणीसाठी देण्यात आले. त्यामध्ये ग्रामपंचायत सदस्यासह पत्नी, मुलगा व वडील असे चौघांचे कोरोना अहवाल पॉझिटिव्ह आले.
सदस्यावर सीपीआर कोविड सेंटरमध्ये उपचार सुरू होते. अखेर त्याचा स्वातंत्र्य दिनी मृत्यू झाला. घरातील सर्वावर कुरूकली येथील कोविड सेंटरमध्ये उपचार सुरू आहेत. खबरदारीचा उपाय म्हणून ग्रामपंचायतीने गावात नागरिकांना मास्क वापरणे सक्ती केली आहे. ग्रामपंचायत पदाधिकारी व दक्षता समिती यांची बैठक होऊन उद्या श्रावण सोमवारी होणारी श्रीकृष्ण यात्रा रद्द केली आहे.
