सांगरुळ शिक्षण संस्थाचालक व सेवकांच्या बैठकीत निर्णय
प्रतिनिधी / वाकरे
सांगरुळ शिक्षण संस्थेचे सेक्रेटरी प्रा.जयंत आसगावकर हे आगामी विधानपरिषद निवडणूक पुणे शिक्षक मतदार संघातून ताकदीने लढवणार असल्याचा निर्णय सांगरुळ शिक्षण संस्था संचालक व सेवकांच्या बैठकीत घेण्यात आला. कुडीत्रे (ता. करवीर) येथील श्रीराम हायस्कूलमध्ये सांगरुळ शिक्षण संस्थेचे संचालक व सर्व सेवकांची संयुक्त बैठक मंगळवारी घेण्यात आली.अध्यक्षस्थानी संस्थेचे अध्यक्ष यशवंत लहुजी खाडे होते.
सांगरूळ शिक्षण संस्थेचे सहसचिव डी. एन. कुलकर्णी यांनी सांगरुळ संस्थेच्या इतिहासात पहिल्यांदाच जयंत आसगावकर यांच्या रूपाने शिक्षण संस्था चालक आणि शिक्षकांना चांगले नेतृत्व लाभल्याचे सांगून विधानपरिषदेच्या रूपाने संस्थेच्या शिरपेचात मानाचा तुरा रोवण्यासाठी सर्वांनी त्यांच्या पाठीशी तन,मन आणि धनाने उभा राहावे असे आवाहन त्यांनी केले.
प्रा.जयंत आसगावकर यांनी शिक्षण क्षेत्रातील अनेक प्रश्न सोडवण्यासाठी शिक्षक आमदारांनी प्रयत्न करणे गरजेचे असल्याचे सांगून आतापर्यंत हे प्रयत्न झाले नाहीत अशी खंत व्यक्त केली. आज शिक्षणक्षेत्रासमोर नवीन शैक्षणिक धोरण इयत्ता ५ वीचा वर्ग प्राथमिक शाळेस जोडणे,व्होकेशनल विभागाचे रूपांतर करणे, शिक्षक भरती बंद असल्याने ती चालू करण्यासाठी प्रयत्न करणे, वरिष्ठ महाविद्यालयातील तासिका तत्वावरील प्राध्यापकांचे प्रश्न सोडवणे, शिक्षकांच्या मुलांना १२ नंतरचे शिक्षण घेण्यासाठी फी सवलत मिळाली पाहिजे यासाठी प्रयत्न करणे असे अनेक प्रश्न प्रलंबित असून हे सोडवण्यासाठी आपण स्वतः शिक्षण संस्था सचिव आणि प्राध्यापक असून या दोन्ही घटकांच्या प्रश्नांची आपल्याला जाण असल्याने विधान परिषदेच्या माध्यमातून हे सर्व प्रश्न आपण मार्गी लावणार असल्याचे ते म्हणाले .शिक्षण क्षेत्रातील अनेक संघटना आपल्या पाठीशी असल्याचे ते म्हणाले. सांगरूळ शिक्षण संस्थेचे अध्यक्ष यशवंत खाडे यांनी आता निवडणुकीतून माघार नाही, म्हणून संस्थेच्या सेवकांनी सर्व शिक्षक मतदारांपर्यंत पोहोचण्यासाठी प्रयत्न करावेत आणि सांगरुळ शिक्षण संस्थेच्या इतिहासात विधानपरिषदेच्या रूपाने सुवर्णपान लिहावे असे आवाहन केले.
यावेळी प्राचार्य डॉ. डी.डी. कुरळपकर, पी.के. पाटील, संजय डी. पाटील, आर. डी. मोरे, प्रा. एस. पी.चौगले, एस. एम. नाळे, शिवाजी पाटील, प्राचार्य डी. पी. भगत,सुभाष कलागते, वसंत पाटील, डॉ.जी.जे.फगरे यांच्यासह अन्य शिक्षकांनी विधायक सूचना करून कोणत्याही परिस्थितीत निवडणुकीतून माघार न घेता प्रा. आसगावकर यांनी विधान परिषद निवडणूक लढवावी अशी ठाम भूमिका मांडली. संस्थेतील सर्व सेवक त्यांच्या पाठीशी ठामपणे उभा राहणार असल्याची ग्वाही सर्वांनी दिली.
स्वागत प्रभारी प्राचार्य ए.के. भगाटे यांनी तर आभार उपप्राचार्य सी.एन वाळके यांनी मानले. या बैठकीला संस्थेचे संचालक आनंदा कासोटे, सदाशिव खाडे, बी.आर.नाळे,डी.जी. खाडे, सर्व शिक्षक, शिक्षकेतर कर्मचारी उपस्थित होते.
सर्व प्रश्नांची जाण असणारे उमेदवार
यावेळी सर्व सेवकांनी जयंत आसगावकर हे संस्थेची जबाबदारी सांभाळत असताना स्वतः शिक्षक म्हणून काम करीत असल्याने त्यांना शिक्षण क्षेत्रातील सर्व प्रश्नांची जाण असल्याचे सांगून त्यांचे शिक्षण संस्था चालक, शिक्षक आणि शिक्षकेतर कर्मचारी यांच्याशी जिव्हाळ्याचे नाते असल्याचे सांगितले. त्यामुळेच ते सक्षम उमेदवार असल्याची भावना सर्वांनी व्यक्त केली.
