70 ते 150 मीली मिटर पावसाचा अंदाज, डोंगरी तालुक्यातील जनतेने सतर्क राहण्याचे आवाहन
प्रतिनिधी / कोल्हापूर
जिल्ह्यात उद्यापासून दोन दिवस पावसाचा जोर वाढणार आहे. भारतीय हवामान वेधशाळेने 21 व 22 जुलै या दिवसांकरिता रेड अलर्ट व 23 जुलै करिता ऑरेंज अलर्ट दिलेला आहे. याकाळात प्रतिदिन 70 ते 150 मि.मी. किंवा त्याहून जास्त पाऊस होण्याची शक्यता आहे. विशेषत: जिल्हयातील चंदगड, आजरा, राधानगरी, शाहूवाडी, पन्हाळा, गगनबावडा, भुदरगड या तालुक्यातील नागरीकांना सतर्कतेचा इशारा देण्यात आला आहे.
वेधशाळेने 20 जुलै रोजी ऑरेंज अलर्ट जाहीर केला होता, त्यानुसार डोंगरी तालुक्यामध्ये जोरदार पाऊस सुरु असल्याने नद्यांच्या पाणीपातळीत वाढ होत असून तलाव, धरणातील पाणीसाठा वेगोन वाढत आहे. आता बुधवार, गुरुवारी दोन दिवस रेड अलर्ट जाहीर केल्याने दक्षता घेण्याची गरज आहे. जिल्हाधिकारी राहूल रेखावार यांनी आपत्ती व्यवस्थापनाची तातडीने बैठक घेऊन सतर्कतेच्या सूचना केल्या आहेत.
अंदाज वर्तवल्यानुसार नदी पात्रातील पाण्याच्या पातळीमध्ये वाढ होण्याची शक्यता आहे. तसेच डोंगराळ भागामध्ये भूस्खलन अथवा दरडी कोसळणे अथवा गावठाणातील जुन्या घरांची पडझड होणे या सारख्या घटना संभावत असल्याने जिल्ह्यातील नागरीकांनी विशेष खबरदारी घेण्याचे आवाहन पाटबंधारे विभागाकडूनही करण्यात आले आहे.
