एकूण २ लाख ७० हजार रुपये किंमतीच्या दहा मोटरसायकल जप्त
वार्ताहर / गोकुळ शिरगाव
गोकुळ शिरगाव पोलिसांनी दहा मोटर सायकल हस्तगत करत दोन मोटरसायकल चोरांना पकडून दोघांना अटक केली. कागल पंचतारांकित एमआयडीसीमध्ये पोलीस नाईक युवराज कांबळे व सुहास संकपाळ यांनी गोपनीय बातमीदाराकडून मिळालेल्या माहितीवरून कागल पंचतारांकित एमआयडीसीमध्ये सापळा रचून विना नंबर प्लेटची गाडी घेऊन फिरत असणाऱ्या राहुल बंडोपंत मोरे (रा. रांगोळी, ता. हातकणंगले) याच्यावर संशय आल्यानंतर अधिक चौकशी केली असता आपण सहा मोटारसायकली चोरल्या असून आणखीन चार मोटरसायकल आपला जोडीदार श्रीधर हरिश्चंद्र नाईक (रा. कसनाळ, ता. निपाणी) याच्याकडे असल्याचे त्याने कबूल केले. एकूण दहा मोटरसायकली या दोघांनी चोरल्याची कबूली त्याने पोलिसांना दिली. शिवाय या गाड्या चोरून आपण कमी दरात विकत असल्याचेही त्याने सांगितले.
या सर्व चोरीच्या गाड्या कोल्हापूर परिसरातील असल्याचेही त्याने यावेळी सांगितले. या सर्व मोटर सायकल गोकुळ शिरगाव पोलिसांनी हस्तगत करुन या मोटर सायकलची किंमत एकूण २ लाख ७० हजार रुपये होत असून या दोघांच्यावर गोकुळ शिरगाव पोलिस ठाण्यात गुन्हा नोंद करण्यात आला आहे.
गोकुळ शिरगाव पोलिस ठाण्याचे सहाय्यक पोलीस निरीक्षक प्रवीण पाटील, पोलीस उपनिरीक्षक आर. डी. गच्चे, प्रणाली पवार, पोलीस हवालदार नितीन सावंत, सलीम शेख, प्रदीप जाधव, युवराज कांबळे, सुहास कांबळे, नितेश कांबळे, राकेश माने, उदय कांबळे, संदीप जाधव यांनी ही कारवाई केली.
