ऑनलाईन टीम / दौंड :
दौंड येथे चोरटय़ांनी सिग्नलची वायर कापून कोणार्क एक्स्प्रेसवर दरोडा टाकण्याचा प्रयत्न केला. या घटनेत एक तरुण गंभीर जखमी झाला आहे. दौड जवळील मानवी फाटय़ाजवळ मंगळवारी रात्री साडेनऊच्या सुमारास ही घटना घडली. याप्रकरणी दौड रेल्वे पोलिसांनी जबरी चोरीचा गुन्हा दाखल केला आहे.
विनायक श्रीराम (वय 27, रा. सोलापूर) असे दरोडेखोरांच्या हल्ल्यात जखमी झालेल्या तरुणाचे नाव आहे.
मिळालेल्या माहितीनुसार, कोणार्क एक्सप्रेस रात्री साडेसात वाजता पुणे स्टेशनवरुन सुटली. रात्री पावणे नऊच्या सुमारास ती नानजीव फाटा येथे आली. या ठिकाणी दरोडेखोरांनी सिग्नलची वायर कापल्याने रेल्वे थांबली. त्यावेळी आंधाराचा फायदा घेत तीन चोरटय़ांनी एस 4 या डब्यात खिडकीत बसलेल्या दोन महिलांच्या गळय़ातील सव्वा लाखांचे मंगळसुत्र व साखळी हिसकावून नेली. तसेच बहिणीची सोनसाखळी चोरणाऱ्या या चोरटय़ांना पकडण्यासाठी खाली उतरलेला विनायक हा चोरटय़ांच्या हल्ल्यात किरकोळ जखमी झाला. यांच्यावर दौड येथे प्राथमिक उपचार केल्यानंतर गाडी सोलापूरला रवाना झाली.
