नवी दिल्ली / वृत्तसंस्था
भाजपचे राष्ट्रीय सरचिटणीस कैलाश विजयवर्गीय यांना आता ‘झेड’ दर्जाची सुरक्षा आणि बुलेटप्रुफ कार पुरविण्यात आली आहे. याअगोदर त्यांना ‘वाय’ दर्जाची सुरक्षा होती. आता मिळणाऱया ‘झेड’ दर्जाच्या सुरक्षा व्यवस्थेत चार ते पाच एनएसजी कमांडोंसह एकूण 22 सुरक्षा रक्षक असतील. यामध्ये दिल्ली पोलीस, आयटीबीपी किंवा सीआरपीएफचे कमांडो व स्थानिक पोलीस कर्मचाऱयांचा समावेश असणार आहे.
मागील आठवडय़ातच भाजपाध्यक्ष जे. पी. नड्डा यांच्या ताफ्यावर पश्चिम बंगालमध्ये हल्ला झाला होता. नड्डा यांना त्यामध्ये कोणतीही दुखापत झाली नसली तरी कैलाश विजयवर्गीय यांच्यासह अन्य नेते जखमी झाले होते. या पार्श्वभूमीवरच कैलाश विजयवर्गीय यांच्या सुरक्षेत वाढ करण्यात आली आहे. भाजपने नड्डा यांच्या ताफ्यावर झालेल्या हल्ल्यानंतर मुख्यमंत्री ममता बॅनर्जी यांच्यावर जोरादार टीका केली आहे. त्याचबरोबर केंद्रीय गृह मंत्रालयाकडून याप्रकरणी कारवाई करण्यात आली असून, पश्चिम बंगालमधील तीन आयपीएस अधिकाऱयांना दिल्लीत बोलावून घेण्यात आले आहे. पश्चिम बंगालमध्ये भाजप व तृणमूल काँग्रेसमध्ये अतिशय तणावाचे वातावरण निर्माण झाल्याचे पाहायला मिळत आहे. दोन्ही पक्षांच्या नेत्यांकडून जोरदार आरोप-प्रत्यारोप सुरू आहेत. शिवाय, कार्यकर्ते देखील आक्रमक झाल्याचे दिसत आहे. कैलाश विजयवर्गीय यांची सुरक्षा या पार्श्वभूमीवर वाढवण्यात आल्याचे दिसत आहे. बंगालमध्ये आगामी वर्षात विधानसभा निवडणूक असल्याने तेथील राजकीय वातावरण चांगलेच तापले आहे. कैलाश विजयवर्गीय हे पश्चिम बंगालमध्ये प्रभारी असल्याने सातत्याने ते विविध ठिकाणी जात असल्यामुळे त्यांच्या सुरक्षेचा मुद्दाही भाजपसाठी महत्त्वाचा आहे.
