केएलई संस्थेचा स्थापना दिवस उत्साहात

बेळगाव : शिक्षणापासून वंचित असलेल्या विद्यार्थ्यांना शिक्षणाची सोय व्हावी, याकरिता कर्नाटक-महाराष्ट्र आणि दिल्लीत केएलई संस्थेच्या शाखा आहेत. याचबरोबर देशभरात 179 हून अधिक शैक्षणिक संस्था आहेत. त्यामुळे लाखोहून अधिक विद्यार्थी शिक्षण घेत आहेत. समाजातील नागरिकांच्या सोयीखातर केएलई संस्था उभी राहिली आहे, असे उद्गार केएलई संस्थेचे कार्याध्यक्ष डॉ. प्रभाकर कोरे यांनी काढले. केएलई संस्थेच्या शनिवारी जिरगे सभागृहात 106 वा स्थापना दिवस पार पडला. यावेळी ते बोलत होते. कार्यक्रमाच्या अध्यक्षस्थानी संस्थेच्या अध्यक्षा महांतेश कौजलगी होते. व्यासपीठावर प्रमुख पाहुणे म्हणून डॉ. विवेक सावजी, डॉ. एस. कुमार, सुनील जलालपूर, डॉ. बी. जी. देसाई, आदी मान्यवर उपस्थित होते. डॉ. प्रभाकर कोरे म्हणाले, मुंबई-पुणे येथे महाविद्यालये सुरू करण्याबरोबर हुबळी येथे देखील वैद्यकीय महाविद्यालय सुरू करण्यात आले आहे. याठिकाणी विद्यार्थ्यांना वैद्यकीय शिक्षण दिले जात आहे. दरम्यान कोरोना काळात शासनाच्या पाठोपाठ केएलई संस्थेने भरीव काम केले आहे. संस्थेच्या आरोग्य विभागाने रुग्णांना वेळेत लसीकरण पुरवठा केला आहे. तसेच मोफत आरोग्य तपासणी शिबिर, मोफत शस्त्रक्रिया, मोफत औषध पुरवठा करून संस्था हित जपत असल्याचे सांगितले. प्रारंभी केएलई संगीत विद्यालयाच्या विद्यार्थिनींनी स्वागतगीत सादर केले. उपस्थित मान्यवरांच्या हस्ते दीपप्रज्वलन झाले. तसेच मान्यवरांचे पुष्पगुच्छ देऊन स्वागत करण्यात आले. याप्रसंगी पालक, विद्यार्थी, प्राध्यापक, मान्यवर उपस्थित होते.