ऑनलाईन टीम / नवी दिल्ली :
केंद्रीय कर्मचाऱ्यांसाठी एक आनंदाची बातमी आहे. केंद्रीय कर्मचाऱ्यांचा महागाई भत्ता पुन्हा सुरू करण्यात आला आहे. तसेच हा महागाई भत्ता तीन टप्प्यांत मिळून 11 टक्के महागाई भत्ता वाढवून देण्याचा निर्णयही घेण्यात आला आहे. पंतप्रधान नरेंद्र मोदी यांच्या अध्यक्षतेखाली झालेल्या मंत्रिमंडळाच्या बैठकीत हा निर्णय घेण्यात आला आहे.
सरकारच्या या निर्णयाचा फायदा केंद्रीय कर्मचाऱ्यांना तसंच पेन्शनधारकांनाही होणार आहे. महागाई भत्त्याचा दर 17 टक्क्यांहून वाढून 28 टक्क्यांवर करण्यात आला आहे.
दरम्यान, गेल्या वर्षी कोरोना संक्रमणाच्या सुरुवातीला एप्रिल महिन्यात केंद्रीय मंत्रिमंडळाने कर्मचाऱ्यांना दिला जाणाऱ्या महागाई भत्त्याचे दोन हप्ते रोखण्याचा निर्णय घेतला होता. महागाई भत्याचा हप्ता प्रत्येक सहा महिन्यांनी जारी केला जातो. वर्षात पहिल्यांदा 1 जानेवारी आणि दुसरा 1 जुलै रोजी महागाई भत्ता जारी केला जातो.
O
आज घेण्यात आलेल्या निर्णयानुसार, 1 जानेवारी 2020, 1 जुलै 2020 आणि 1 जानेवारी 2021 पासून लागू होणाऱ्या तीन हप्त्यांवरील स्थगिती मागे घेण्यात आली आहे. यानंतर तीन हफ्ते मिळून एकूण 11 टक्के वाढ कर्मचाऱ्यांना मिळणार आहे. म्हणजेच महागाई भत्त्याचा सद्य दर 17 टक्क्यांहून वाढून 28 टक्के करण्यात आला आहे. सरकारच्या या निर्णयाचा फायदा केंद्रीय कर्मचाऱ्यांना तसेच पेन्शनधारकांनाही होणार आहे.
