केंद्रीयमंत्री सदानंदगौडा यांनी घेतला लसीचा दुसरा डोस

बेंगळूर : केंद्रीयमंत्री डी. व्ही. सदानंदगौडा यांनी बुधवारी कोरोना प्रतिबंधक लसीचा दुसरा डोस घेतला. केंद्र सरकारने लसीकरण अभियानांतर्गत 45 वर्षांवरील नागरिकांसाठी लस देण्यास सुरुवात केली आहे. सदानंदगौडा यांनी बेंगळूरच्या के. सी. जनरल इस्पितळात लसीचा दुसरा डोस घेतला. त्यानंतर पत्रकारांशी बोलताना ते म्हणाले, पहिला डोस घेतल्यानंतर 40 दिवसांनी आपण आता दुसरा डोस घेतला आहे. लसीचा कोणताही प्रतिकूल परिणाम जाणवलेला नाही. केंद्र सरकार 45 वर्षाखालील नागरिकांनाही लस देण्याची तयारी करत आहे. देशात कोव्हिशिल्ड आणि कोव्हॅक्सिन लस पुरेशा प्रमाणात उपलब्ध आहे. आतापर्यंत 22 कोटी डोसचे उत्पादन करण्यात आले आहे. आतापर्यंत 11 ते 12 कोटी जणांना लस देण्यात आली आहे. कोरोना नियंत्रणासाठी भारताकडे मदत मागितलेल्या 90 देशांना लसीचे 6 कोटी डोस पाठवून देण्यात आले आहे. आता रशियाच्या स्फुटनिक-व्ही लसीला मान्यता देण्यात आली आहे. त्यामुळे आगामी दिवसांत लसीकरणाला आणखी वेग येणार आहे, असे ते म्हणाले.