कुंदरगी पंपहाऊसची वीजवाहिनी जळाल्याने पाणीपुरवठा ठप्प
प्रतिनिधी / बेळगाव
शहराला पाणीपुरवठा करणाऱया हिडकल पाणी योजनेच्या कुंदरगी पंपिंग हाऊसच्या विद्युत पुरवठय़ात तांत्रिक बिघाड झाल्याने पाणीपुरवठा ठप्प झाला आहे. येथील विद्युतपंपांची वीजवाहिनी जळाल्याने वीजपुरवठा खंडित झाला. परिणामी जलशुद्धीकरण केंद्राचा पाणीपुरवठा बंद झाल्याने शहराच्या विविध भागातील पाणीपुरवठय़ात व्यत्यय निर्माण झाला आहे. त्यामुळे एक दिवस उशीरा पाणीपुरवठा करण्यात येणार असल्याची माहिती पाणीपुरवठा मंडळाने दिली.
शनिवारी हिडकल जलाशयाच्या पाणीपुरवठय़ात व्यत्यय निर्माण झाला आहे. सध्या होत असलेल्या पावसामुळे वीजपुरवठय़ात बिघाड होत आहे. हिंडलगा पंपिंग स्टेशनचा वीजपुरवठा बंद झाल्याने राकसकोप जलाशयामधून लक्ष्मीटेकडी जलशुद्धीकरण केंद्रात पाणीपुरवठा करता आला नाही. कुंदरगी विद्युतपंपांची वीजवाहिनी बर्स्ट झाल्याने विद्युतपंप बंद ठेवावे लागले. त्यामुळे हिडकल जलाशयाचा पाणीपुरवठा शनिवारी दुपारपासून बंद ठेवण्यात आला होता. दुपारी वीजवाहिन्या बदलण्याचे काम हाती घेण्यात आले. हे काम रात्री 8 वा. पूर्ण झाले. पण दुपारपासून रात्री 8 वाजेपर्यंत जलशुद्धीकरण केंद्रात पाणीपुरवठा करता आला नाही. त्यामुळे शहराच्या पाणीपुरवठय़ात व्यत्यय निर्माण झाला आहे. परिणामी शहराच्या पाणीपुरवठा नियोजनात बदल करण्यात आला असून एक दिवस उशिरा पाणीपुरवठा करण्यात येणार असल्याची माहिती पाणीपुरवठा मंडळाने दिली आहे. त्यामुळे शहरवासियांनी सहकार्य करावे, असे आवाहन करण्यात आले आहे.
