भुतरामट्टीजवळ भीषण अपघातात चौघे जखमी
प्रतिनिधी/ बेळगाव
भरधाव कार रस्त्याशेजारच्या झाडावर आदळून पुणे-बेंगळूर राष्ट्रीय महामार्गावरील भुतरामट्टीजवळ रविवारी सकाळी घडलेल्या भीषण अपघातात महात्मा फुले रोड शहापूर येथील एका तरुणाचा मृत्यू झाला. तर कारमधील अन्य चौघेजण जखमी झाले. काकती पोलीस स्थानकात या अपघाताची नोंद झाली आहे.
अभिषेक सुभाष धोंगडी (वय 21 रा. महात्मा फुले रोड शहापूर) असे दुर्दैवी तरुणाचे नाव आहे. गंभीर जखमी अवस्थेत सिव्हिल हॉस्पिटलला आणताना वाटेतच त्याचा मृत्यू झाला. ओमकार प्रकाश घोलपे (वय 19 रा. पिरनवाडी), ओमकार नारायण बाळेकुंद्री (वय 21 रा. महात्मा फुले रोड), निकीत किशन परगोला (वय 19 रा. उद्यमबाग), विनायक सुनील कणेरी (वय 20 रा. शहापूर) अशी जखमींची नावे आहेत.
जखमींवर खासगी इस्पितळात उपचार करण्यात येत आहेत. एका तरुणाची प्रकृती चिंताजनक असल्याचे पोलीस सूत्रांनी सांगितले. केए 22, झेड 2153 क्रमांकाच्या कारमधून कोल्हापूरहून बेळगावकडे येताना कारवरील नियंत्रण सुटून कार झाडाला आदळल्याने ही घटना घडली आहे.
घटनेची माहिती समजताच काकतीचे पोलीस निरीक्षक श्रीशैल कौजलगी व त्यांच्या सहकाऱयांनी घटनास्थळी भेट देऊन पंचनामा केला. या अपघातात मृत्युमुखी पडलेला अभिषेक हा पुढे बसला होता. गंभीर जखमी अवस्थेत सिव्हिल हॉस्पिटलला हलविताना त्याचा मृत्यू झाल्याचे पोलीस सूत्रांनी सांगितले. काकती पोली पुढील तपास करीत आहेत.
