ग्रामीण भागातील घरांच्या मालमत्तेवर ग्रामस्थांना कर्ज शक्य
प्रतिनिधी / कणकवली:
ग्रामीण भागातील घरांच्या मालमत्तेवर ग्रामस्थांना कर्ज उपलब्ध होऊ शकणार आहे. ग्रामस्थांच्या मालकी हक्क दर्शविणाऱया मालमत्ता कर आकारणीपत्रक नमुना 8 वर कर्जाच्या बोजाची नोंद करण्यास मनाई करण्यात आलेला शासन निर्णय रद्द केल्याने ग्रामस्थांमधून समाधान व्यक्त करण्यात येत आहे. त्यामुळे आता ग्रामस्थांना घराच्या मालमत्तेवर बोजा चढवून बँका, पतसंस्था किंवा इतर अधिकृत वित्त संस्थांकडून कर्ज घेता येणार आहे.
कोरोनामुळे सध्या सर्वचजण अडचणीत आले आहेत. ग्रामीण भागातील नागरिक, शेतकरी, विद्यार्थी आदी वित्तीय संस्थांकडून कर्ज घेऊन पुन्हा आपले आयुष्य सावरण्याचा प्रयत्न करत आहेत. काहीजण घराच्या मालमत्तेवर बोजा चढवून कर्ज घेण्याचा प्रयत्न करतात. पण ग्रामविकास विभागाच्या 2017 च्या निर्णयामुळे घरांचे मालकी हक्क दर्शविणाऱया मालमत्ता कर आकारणी पत्रक नमुना 8 वर कर्जाच्या बोजाची नोंद करण्यास मनाई करण्यात आली होती. आता हा शासन आदेश रद्द करून नमुना 8 वर बँका, पतसंस्था आणि इतर अधिकृत वित्तीय संस्थांना कर्जाचा बोजा चढविण्यास अनुमती देण्यात येत असल्याचे ग्रामविकासमंत्री हसन मुश्रीफ यांनी स्पष्ट केले आहे. त्यामुळे ग्रामस्थांना कर्ज मिळणे सुलभ होणार आहे.
