कराड / प्रतिनिधी :
कराड नगरपरिषदेच्या नगरपालिका वाचनालयात सुरु असलेल्या स्पर्धा परीक्षा अभ्यासिकेतून 21 जानेवारी 2021 रोजी लागलेल्या निकालात 9 विद्यार्थ्यांनी सुयश संपादन केले आहे. नगराध्यक्षा रोहिणी शिंदे, उपनगराध्यक्ष व शिक्षण समिती सभापती जयवंतराव पाटील, गट नेते राजेंद्रसिंह यादव, बांधकाम सभापती हणमंतराव पवार, नियोजन सभापती विजय वाटेगावकर, महिला व बालकल्याण सभापती स्मिता हुलवान, ज्येष्ठ नगरसेवक विनायक पावसकर यांच्या हस्ते या विद्यार्थ्यांचा सत्कार करण्यात आला. याप्रसंगी ओंकार मुळे, महेश कांबळे, निशांत ढेकळे, जयंत बेडेकर, शिवराज इंगवले, ग्रंथपाल संजय शिंदे उपस्थित होते.
पालिकेचे नगरवाचनालय यशवंतराव चव्हाण स्मृतिसदन येथे सुरु आहे. सन 2012 या वर्षी वाचनालयात स्पर्धा परीक्षेसाठी अभ्यासिका सुरु करण्यात आली. या नगरवाचनालयात 72 हजार पुस्तके उपलब्ध असून स्पर्धा परीक्षेच्या अभ्यासकांकरीता स्वतंत्र अभ्यासिका आहे. 4 हजार पुस्तके उपलबध आहेत. सकाळी 7 ते रात्री 11 या वेळेत अभ्यासिका खुली असते. सर्व सामान्य कुटुंबातील शेकडो गरीब, होतकुरु मुला मुली या अभ्यासिकेचा लाभ घेत आहेत. नगरपालिकेने सामाजिक बांधीलकेने सुरु केलेल्या या उपक्रमाचा लाभ घेऊन गेल्या 8 वर्षात सर्व सामान्य कुटुंबातील 95 मुलामुलींनी स्पर्धा परीक्षेतून यश मिळवले असून त्यांनी शासन सेवेत दाखल होण्याचा मान मिळविला आहे.
नुकतीच निवड झालेल्या 9 विद्यार्थ्यांमध्ये अक्षय कदम, पिंपरी याची सीआयएसएफमध्ये निवड झाली. प्रतीक केंजळे, साखरवाडी याची सीआरपीएफमध्ये, अमर पाटोळे याची एसएसबी पदी, अक्षय शेडगे, हणबरवाडी याची बीएसएफमध्ये, प्रशांत जगदाळे, मसूर याची आसाम राईफलमध्ये, अक्षय साळुखे, किवळ, अक्षय घोरपडे, विंग व ओंकार हजारे, कासारशिरंबे याची सीआयएसएफमध्ये निवड झाली. किशोर कांबळे, मसूर याची आसाम राईफलमध्ये निवड झाली आहे. प्रास्ताविक ए. आर. पवार यांनी केले. सध्या अभ्यासिकेचा लाभ 80 विद्यार्थी घेत आहेत.
