दादासाहेब फाळके गोल्डन कॅमेरा पुरस्कार 2019 मध्ये एक होतं पाणी या मराठी चित्रपटाला एकूण तीन पुरस्कार प्राप्त केली आहेत. सर्वोत्कृष्ट सामाजिक चित्रपट – एक होतं पाणी, सर्वोत्कृष्ट खलनायक- अनंत जोग, सर्वोत्कृष्ट गीतकार – आशिष निनगुरकर असे पुरस्कार जाहीर झाले आहेत.
भारतीय चित्रपटाचे जनक दादासाहेब फाळके यांच्या नावाने दिला जाणारा हा पुरस्कार सोहळा मराठी सिनेजगतात अतिशय सन्मानाचा समजला जातो. या पुरस्कारासाठी व्ही.पी.वर्ल्ड मुव्हीज यांची निर्मिती असलेल्या एक होतं पाणी या चित्रपटाची निवड झाली. डॉ.प्रविण भुजबळ आणि विजय तिवारी हे या चित्रपटाचे निर्माते आहेत. या चित्रपटाचे दिग्दर्शन रोहन सातघरे यांचे असून योगेश अंधारे यांनी छायाचित्रणाची जबाबदारी पार पाडली आहे. एक होता राजा, एक होती राणी.उद्या म्हणू नका, एक होतं पाणी अशी हटके टॅग लाईन असलेल्या या चित्रपटातून पाण्याची वास्तव दाहकता मांडण्यात आलेली आहे. याचीच नोंद घेऊन दादासाहेब फाळके गोल्डन कॅमेरा अवॉर्ड 2019 यासाठी एक होतं पाणी या सिनेमाला एकूण 7 नामांकने मिळाली होती त्यापैकी एकूण 3 पुरस्कारांवर चित्रपटाने बाजी मारली आहे.
या चित्रपटात अनंत जोग, हंसराज जगताप, श्रीया मस्तेकर, चैत्रा भुजबळ, गणेश मयेकर, यतीन कारेकर, रणजित जोग, दीपज्योती नाईक, त्रिशा पाटील, जयराज नायर, आशिष निनगुरकर, डॉ.राजू पाटोदकर, शीतल शिंगारे, शीतल कल्हापुरे व उपेंद्र दाते आदी कलाकारांच्या भूमिका आहेत. या चित्रपटाचे लेखन व गीते आशिष निनगुरकर यांनी लिहिली असून संगीतकार म्हणून विकास जोशी यांनी काम केले आहे. ऋषिकेश रानडे, आनंदी जोशी, रोहित राऊत व विकास जोशी यांनी या गाण्यांना आवाज दिला आहे. प्रतिश सोनवणे, सुनील जाधव व स्वप्नील निंबाळकर यांनी निर्मिती व्यवस्थापनाची जबाबदारी सांभाळली आहे. आतापर्यंत या सिनेमाला विविध फेस्टिवलमध्ये गौरविण्यात आले आहे.
