क्रीडा प्रतिनिधी /बेळगाव
युनियन जिमखान्यावर माळमारूती स्पोर्ट्स क्लब आयोजित माळमारूती चषक निमंत्रितांच्या आंतरक्लब क्रिकेट स्पर्धेत शुक्रवारी एक्स्ट्रिम स्पोर्ट्स संघाने एसकेई सोसायटी संघाचा 8 गडय़ानी तर युनियन जिमखाना संघाने युनायटेड स्पोर्ट्स क्लबचा 6 गडय़ाने पराभव करून प्रत्येकी 3 गुण मिळविले. सागर अंगडी व राहुल नाईक यांना सामनावीर पुरस्कार देण्यात आला.
जिमखाना मैदानावर सकाळी खेळविण्यात आलेल्या पहिल्या सामन्यात एसकेई सोसायटी संघाने 20 षटकात सर्व गडी बाद 132 धावा केल्या. देवेंद्र कुडचीने 41, देवीदास कम्मारने 16 धावा केल्या. एक्स्ट्रिम स्पोर्ट्सतर्फे सागर गौरगोंडाने 26 धावात 4, बसवराज एच. ने 2 तर संतोष सांबरेकरने 2 गडी बाद केले. प्रत्युत्तरादाखल खेळताना एक्स्ट्रिम स्पोर्ट्स संघाने 13 षटकात 2 गडी बाद 134 धावा करून सामना 8 गडय़ाने जिंकला. सागर अंगडीने 57, गुरू पोतदारने 43, गजानन पाटीलने 32 धावा केल्या. एसकेईतर्फे गौरव तेलंगाजीने 2 गडी बाद केले.
दुसऱया सामन्यात युनायटेड स्पोर्ट्सने 20 षटकात 9 गडी बाद 139 धावा केल्या. प्रत्युत्तरादाखल खेळताना युनियन जिमखाना संघाने 14.1 षटकात 4 गडी बाद 141 धावा करून सामना 6 गडय़ांनी जिंकला.
