– अर्धा लिटर लिक्विडमधून मिळणार एक गोणी खताची मात्रा, -पिकांचे उत्पादन वाढण्यास होणार मदत
कृष्णात चौगले/कोल्हापूर
इंडियन फार्मर्स फर्टिलायजर को-ऑपरेटिव्ह लिमिटेड कंपनीने (इफको) जगात पहिल्यांदाच `नॅनो युरिया लिक्विड’ तयार केले आहे. यामुळे पिकांचे उत्पादन वाढून शेतकऱयांचे उत्पन्न वाढण्यास मदत होणार आहे. आता एक गोणी युरिया खताच्या ऐवजी अर्धा लिटर नॅनो युरिया लिक्विड पुरेसे ठरणार आहे. जमिनीत युरियाचा वापर कमी करण्याच्या पंतप्रधान नरेंद्र मोदी यांच्या आवाहनाने प्रेरित होऊन कंपनीने हे लिक्विड तयार केले आहे. 31 मे 2021 रोजी इफकोच्या 50 व्या वार्षिक सर्वसाधारण बैठकीत `नॅनो युरिया लिक्विड’ बनवल्याची घोषणा केली असल्याची माहिती इफकोचे राज्य विपनन व्यवस्थापक यू .आर. टिजारे यांनी `तरुण भारत’शी बोलताना दिली.
इफकोने बनवलेल्या नॅनो युरिया लिक्विडची 500 मिलीची एक बाटली सामान्य युरियाच्या एका गोणीच्या बरोबरीची आहे. इफकोने शेतकऱयांसाठी 500 मिली नॅनो युरियाच्या एका बाटलीची किंमत 240 रुपये निर्धारित केली आहे, जी सामान्य युरिया खताच्या गोणीच्या किमतीपेक्षा 10 टक्क्यांनी कमी आहे.
शेतकऱयांच्या खर्चात होणार बचत
`कमी प्रमाण आणि मोठी क्षमता’ या दृष्टीने हे नॅनो युरिया लिक्विड तयार करण्यात आले आहे. इफकोने बनवलेल्या नॅनो युरिया लिक्विडची 500 मिलीची एक बाटली सामान्य युरियाच्या एका गोणीच्या बरोबरीची आहे. याच्या वापरामुळे शेतकऱयांचा खर्च कमी होणार आहे. या लिक्विडच्या बाटलीचा आकार लहान असल्याने शेतकऱयांना ने-आण करणे सोपे होणार आहे.
पिकांच्या उत्पादनात होणार वाढ
इफको कंपनीचे टिजारे यांच्या दाव्यानुसार नॅनो युरिया लिक्विड रोपांच्या पोषणासाठी प्रभावी आणि परिणामकारक आहे. याच्या वापरामुळे पिकांचे उत्पादन वाढते. तसेच पोषक तत्वांच्या गुणवत्तेत सुधारणा होते. नॅनो युरिया लिक्विडमुळे जमिनीतील पाण्याच्या पातळीची गुणवत्ता सुधारणा तसेच जलवायू परिवर्तन आणि टिकाऊ उत्पादनावर सकारात्मक परिणाम करुन ग्लोबल वार्मिंग कमी करण्यात महत्त्वाची भूमिका निभावली जाणार आहे. हे लिक्विड शेतकऱयांना स्वस्त उपलब्ध होणार असून उत्पादन क्षमता वाढणार आहे. परिणामी शेतकऱयांचा खर्च कमी होऊन उत्पादन वाढल्याने कमाई जास्त होणार आहे.
कृषी क्षेत्र परीक्षणानुसार उत्पादनात 8 टक्के वाढ
इफको कंपनीच्या माहितीनुसार संपूर्ण देशातील 94 पेक्षा जास्त पिकांवर सुमारे 11 हजार कृषी क्षेत्र परीक्षण (एफएफटी) करण्यात आले होते. यामुळे पिकांच्या उत्पादनात सरासरी 8 टक्क्यांची वाढ झाल्याचे पाहायला मिळाले. इफकोच्या वैज्ञानिक आणि अभियंत्यांनी नॅनो युरिया लिक्विड हे कलोलमधील नॅनो बायोटेक्नॉलॉजी रिसर्च सेंटरमध्ये तयार केले आहे. हे लिक्विड सामान्य युरिया खताचा वापर 50 टक्क्याने कमी करण्याच्या उद्देशाने तयार केले आहे. याच्या 500 मिलीच्या एका बाटलीत 40,000 पीपीएम नायट्रोजन असतो, ज्यामधून सामान्य युरिया खताच्या गोणीएवढे नायट्रोजन पोषक तत्व मिळते.
लिक्विडचे उत्पादन सुरु, लवकरच विक्री
इफको नॅनो युरियाच्या उत्पादनाला सुरुवात झाली असून लवकरच याची विक्रीही केली जाईल. इफकोने शेतकऱयांसाठी 500 मिली नॅनो युरियाच्या एका बाटलीची किंमत 240 रुपये निश्चित केली आहे. जी सामान्य युरिया खताच्या गोणीच्या किमतीपेक्षा 10 टक्क्यांनी कमी आहे. भारतात दरवर्षी सुमारे 350 लाख टन युरियाचा वापर केला जातो. नॅनो युरियामुळे खताचा वापर निम्म्याने कमी होईल. अनुदानावर वार्षिक 600 कोटी रुपयांपर्यंतची बचत होऊ शकते. यामुळे भारताची युरिया आयात करण्याची गरजही कमी होईल. विजय भुनगे – इफकोचे क्षेत्र अधिकारी, कोल्हापूर
