ऑनलाईन टीम / मुंबई :
पुणे जिल्हा परिषदेच्या सदस्या आशा बुचके यांनी शिवसेनेला राम राम करत भाजपमध्ये प्रवेश केला आहे. विरोधीपक्ष नेते देवेंद्र फडणवीस यांच्या उपस्थितीत मुंबईत आशा बुचके यांनी पक्षप्रवेश केला आहे.
आशा बुचके या शक्तीप्रदर्शन करत पुण्याहून मुंबईला रवाना झाल्या. मुंबईत देवेंद्र फडणवीस यांच्या उपस्थितीत त्यांनी भाजपमध्ये प्रवेश करण्यापूर्वी जोरदार शक्तिप्रदर्शन केले. भाजपमध्ये प्रवेश केल्यानंतर आशा बुचके म्हणाल्या, शिवसेनेत असताना मी निष्ठेने काम केले.
दरम्यान, आशा बुचके यांनी जवळपास 15 वर्षे शिवसेनेचे काम केले होते. 2014 मध्ये आशा बुचके यांनी शिवसेनेकडून जुन्नर विधानसभेची निवडणूकही लढवली होती. मात्र केवळ पाच हजार मतांच्या फरकाने त्यांना मनसेच्या शरद सोनावणेंकडून पराभव स्वीकारावा लागला होता. 2019 मध्ये मनसेचे तत्कालीन आमदार शरद सोनवणे शिवसेनेत आले आणि त्यांना विधानसभेचे तिकीट मिळाले. त्यानंतर बुचकेंनी अपक्ष निवडणूक लढवत तिसऱया क्रमांकाची मते मिळवली होती.
