आळशी लोक ‘नायक’

कोरोना विषाणूच्या विरोधातील लढाईत आळशी लोकांना नायकाप्रमाणे सादर करणारी एक जाहिरात जर्मनीच्या सरकारने प्रसिद्ध केली आहे. सरकारने 90 सेकंदांची चित्रफित शनिवारी ऑनलाईन प्रसारित केली आहे. यात एक वृद्ध व्यक्ती 2020 च्या हिवाळय़ात कोरोना महामारीदरम्यान स्वतःच्या देशाची सेवा कशाप्रकारे केली हे सांगताना दिसून येतो. “अचानकपणे या देशाचे भवितव्य आमच्या हातात आले, तेव्हा आम्ही साहस गोळा केले आणि योग्य होते तेच केले. म्हणजेच आम्ही काहीच केले नाही. दिवसरात्र आम्ही घरात हातपाय पसरून पडून राहिलो आणि कोरोना विषाणूशी लढत राहिलो. आमचा मोर्चा आमचा सोफा होता आणि आमचे धैर्य आमचे अस्त्र होते’’ असे संबंधित व्यक्ती सांगत असल्याचे चित्रफितीत दिसून येते. या जाहिरातीच्या अखेरीस सरकारकडून “घरात थांबून तुम्हीही नायक होऊ शकता’’ असा संदेश देण्यात आला आहे. कोरोना संक्रमण रोखण्यासाठी जर्मनीच्या सरकारने मे महिन्यापासून निर्बंध लागू केले आहेत. तेथे रेस्टॉरंट, बार आणि व्यायामशाळा बंद करण्यात आल्या असून लोकांच्या एकत्र येण्यावरही बंधने आहेत.