मुंबई \ ऑनलाईन टीम
सर्वोच्च न्यायालयाने मराठा आरक्षण रद्द केल्यानंतर या निकालाच्या १०२ व्या घटनादुरुस्तीच्या मुद्द्यावर केंद्राने केलेली पुनर्विचार याचिकादेखील न्यायालयाने फेटाळली आहे. यानंतर विविध राजकीय नेत्यांनी यावर प्रतिक्रिया दिल्या आहेत. काँग्रेसचे प्रदेशाध्यक्ष नाना पटोले यांनी देखील यावरून भाजपवर निशाणा साधला आहे. आरक्षण संपुष्टात आणणे हा भाजप व राष्ट्रीय स्वयंसेवक संघाचा डाव आहे, असा आरोप त्यांनी केला आहे.
नाना पटोले माध्यमांशी बोलताना म्हणाले की, मराठा आरक्षणाप्रश्नी केंद्र सरकारने दाखल केलेली पुनर्विचार याचिका सुप्रीम कोर्टाने फेटाळल्याने आरक्षण देण्याचा अधिकार केंद्र सरकारलाच आहे हे स्पष्ट झाले आहे. १०२ व्या घटनादुरुस्तीने राज्यांचे अधिकार केंद्रातील मोदी सरकारने काढून घेतलेले आहेत. त्यामुळे राज्याला आरक्षण देण्याचा कोणताच अधिकार राहिलेला नसतानाही फडणवीस सरकारने आरक्षणचा कायदा केला. तो सुप्रीम कोर्टात टिकू शकला नाही. सुप्रीम कोर्टाच्या या भूमिकेमुळे भाजपचा खोटारडेपणा उघडा पडला असून त्यांच्याकडे आता सांगण्यासारखे काहीच उरलेले नाही. आरक्षण संपुष्टात आणणे हा भाजप आणि राष्ट्रीय स्वयंसेवक संघाचा डाव असल्याचा आरोप देखील नाना पटोले यांनी यावेळी केला.
नाना पटोले पुढे म्हणाले की,भाजपने मराठा समाजाची तसेच विधानसभेचीही दिशाभूल केली आहे. मराठा समाजाला आरक्षण देण्याचा अधिकार राज्यांना नसल्याचे अधोरेखीत झाल्याने केंद्र सरकारने मराठा समाजाला न्याय द्यावा, अशी मागणी देखील त्यांनी यावेळी केली. तसेच विरोधी पक्षांमध्ये भीती निर्माण व्हावी यासाठीच ईडी, सीबीआय सारख्या केंद्रीय तपास यंत्रणांचा गैरवापर भाजप करत आहे. त्यांच्या दहपशाहीला आम्ही भीत नाही. अमित शाह यांच्या मुलाची संपत्तीही भरमसाठ वाढली आहे. त्याची चौकशी ईडी का करत नाही?, तसेच जो भाजपमध्ये प्रवेश करतो त्याचे सर्व पाप धुतले जातात आणि जे विरोधी पक्षात आहेत त्यांच्यामागे चौकशीचा लावली जातो, हे लोकशाहीसाठी घातक असल्याचे देखील नाना पटोले यावेळी म्हणाले.
