तरुण भारत संवाद प्रतिनिधी / बार्शी
आमदार राजेंद्र राऊत यांनी बार्शी नगरपरिषदेमध्ये, बार्शी शहरांमध्ये सुरू असलेली विविध विकास कामे व रखडलेली, प्रलंबित विकासकामे याबाबतची माहिती घेण्यासाठी नगर परिषदेचे सर्व खातेप्रमुख, नगरसेवक, इंजिनिअर व प्रमुख ठेकेदार यांची संयुक्त आढावा बैठक घेतली.
या बैठकीत आमदार राजेंद्र राऊत यांनी विकास कामांना गती देवून ती कामे लवकर पूर्ण करण्यासाठी सुचना दिल्या. तसेच बार्शीकर नागरिकांना मुलभूत सोयी-सुविधा उपलब्ध करून देण्यासाठी, नागरिकांच्या अडी-अडचणी जाणून घेण्यासाठी आम्ही कटिबद्ध असून, कोरोना कालावधीमुळे रखडलेली व अपूर्ण कामांमुळे बार्शीकर नागरिकांना झालेल्या त्रासामुळे आमदार राऊत यांनी बार्शीकर जनतेची माफीही मागितली तर आगामी काळात आमदार आपल्या दारी हे अभियान राबवणार असून ते स्वतः बार्शी शहरात लवकरच घरोघरी फिरून नागरिकांचे प्रश्न, अडी-अडचणी, मूलभूत सुविधा यांबद्दल जाणून घेऊन त्या सोडविण्यासाठी प्रयत्नशील असल्याचे त्यांनी सांगितले.
यावेळी बोलताना आमदार राजेंद्र राऊत म्हणाले की, बार्शी शहर व तालुक्याची विकास कामे करत असताना कायद्याच्या चौकटीत राहूनच बार्शी नगरपरिषद, पंचायत समिती, कृषी उत्पन्न बाजार समिती यांच्या माध्यमातून अनेक विकासकामे केली व सध्या सुरू आहेत. परंतु बार्शीतील राजकीय मनोरूग्ण, सतत फेसबुकवर लाईव्ह येणारी विघ्नसंतोषी, प्रापंचिक अपयशी, व्यावसायिक अपयशी, लायकी नसलेली लोकं एखाद्या दुसऱ्या टेक्निकल मुद्द्यावर तक्रारी करून विकास कामांना खीळ बसवून नागरिकांना वेठीस धरत आहेत. त्यांनी व्यक्तीगत मला जरूर विरोध करावा, परंतु विकास कामांना विरोध करू नये.
