अमेझॉनचे लक्ष अपोलो फार्मसीवर

बेंगळूर : अमेझॉन या कंपनीकडून भारतातील अपोलो फार्मसी या कंपनीत 10 कोटी डॉलर्स (साधारणतः 750 कोटी रूपये) गुंतवणूक होण्याची शक्यता आहे. देशात वेगाने विकसीत होणाऱया औषध बाजारपेठेत आपले स्थान निर्माण करण्याचा प्रयत्न या गुंतवणुकीच्या माध्यमातून अमेझॉन करणार आहे, असे सांगण्यात आले. औषधे घरपोच उपलब्ध करून देण्याचा व्यवसाय अमेझॉन कंपनीने भारतात यापूर्वीच सुरू केला आहे. रिलायन्स कंपनीही या व्यवसायात आहे. रिलायन्सला स्पर्धा करण्याच्या हेतूने हा एवढय़ा मोठय़ा गुंतवणुकीचा निर्णय घेण्यात आल्याची माहिती सूत्रांनी दिली. रिलायन्सने नुकतीच नेटमेटडस् या कंपनीत गुंतवणूक करून या कंपनीचे बव्हंशी समभाग विकत घेतले आहेत. भारतात विस्तार करण्याच्या योजनेबरोबर अमेझॉनने अमेरिकेतील औषध बाजारपेठेवरही लक्ष केंद्रित केले आहे.