शाहू स्मारक भवनमध्ये 1 मार्च रोजी वितरण सोहळा
प्रतिनिधी / कोल्हापूर
नटश्रेष्ठ जयशंकर दानवे यांच्या स्मरणार्थ दिला जाणारा यंदाचा कलायात्री पुरस्कार ज्येष्ठ अभिनेते, निर्माते, दिग्दर्शक महेश कोठारे यांना जाहीर झाला आहे. पुरस्काराचे यंदाचे अकरावे वर्ष आहे. सोमवार 1 मार्च रोजी दानवे यांच्या 111 व्या जयंतीदिनी येथील शाहू स्मारक भवनमध्ये सायंकाळी पाच वाजता पुरस्कार वितरण सोहळा होणार आहे. ही माहिती संयोजक जयश्री दानवे, राजदर्शन दानवे, सुधीर पेटकर यांनी दिली.
गेली 35 वर्षे वेगवेगळ्या सांस्कृतिक उपक्रमाद्वारे जयशंकर दानवे यांचे स्मरण दानवे परिवारातर्फे केले जाते. 2011 मध्ये कलायात्री पुरस्कार सुरू झाला. हा पुरस्कार नाटक, चित्रपट, दूरचित्रवाणी या माध्यमांवर पकड असणार्या रंगकर्मींना देण्यात येतो. शाल, श्रीफळ, सन्मानपत्र, सन्मानचिन्ह असे या पुरस्काराचे स्वरूप आहे. आजपर्यंत दिलीप प्रभावळकर, डॉ.मोहन आगाशे, सदाशिव अमरापूरकर, शरद पोंक्षे, अरुण नलावडे, सुबोध भावे, प्रशांत दामले, डॉ. गिरीश ओक, भरत जाधव, अविनाश व ऐश्वर्या नारकर या रंगकर्मींना हा पुरस्कार प्रदान करण्यात आला आहे.
पुरस्कार वितरण सोहळ्यात कोठारेंची प्रकट मुलाखत
बालवयापासून हिंदी व मराठी सिनेसृष्टी गाजविणारे अभिनेते आणि धुमधडाका, दे दणादण, थरथराट, झपाटलेला असे अनेक मराठी चित्रपटातील कलाकार, दिग्दर्शक आणि जय मल्हार, विठू माऊली आणि सध्या गाजत असलेली दख्खनचा राजा जोतिबा अशा मालिकांचे निर्माते महेश कोठारे यांची कलायात्री पुरस्कारानंतर प्रकट मुलाखत होणार आहे. कमला कॉलेजचे प्रा. डॉ. सुजय पाटील हे मुलाखत घेणार आहेत. या सोहळ्याचा आनंद सर्व रसिक प्रेक्षकांनी घ्यावा, असे आवाहन दानवे परिवाराच्या वतीने करण्यात आले आहे.
